ल्होसारमा सभामुख सापकोटाको शुभकामना

प्रतिनिधिसभाका सभामुख अग्निप्रसाद सापकोटाले ल्होसारको अवसरमन शुभकामना दिएका छन् ।

सभामुख सापकोटाले तामाङ, शेर्पा, ह्योल्मो लगायतका नेपालका आदिवासी जनजातिहरुको मुख्य पर्व एवं नयाँ बर्ष, ‘२८५७ औं सोनाम ल्होछार’ र ‘२१४८ औं ग्याल्वो लोसार’को अवसरमा यी पर्व मनाउनु हुने सबैमा शुभकामना व्यक्त गरेका हुन् ।

“विविधतायुक्त जातीय उपस्थिति रहेको नेपालमा सबैको आ–आफ्नै संस्कृति, परम्परा र रितिरिवाज रहेका छन् । मौलिकता बोकेका चाड पर्वहरुले आफ्नै विशेषता र महत्व बोकेका छन् । यस्ता पर्वहरु विविधताभित्र देखिने मौलिकताका नमूना हुन् ।” सापकोटाले जारि गरेको शुभकामना सन्देशमा भनिएको छ- “बहुजातीय, बहुभाषिक, बहुधार्मीक, बहुसाँस्कृतिक देश नेपालमा यसरी मनाइने चाड पर्वले नेपालीबीचको आपसी सहिष्णुता, भातृत्व र सामाजिक एवं साँस्कृतिक ऐक्यबद्धताको बढोत्तरी गर्न महत्वपूर्ण योगदान पुग्ने विश्वास लिएको छु । हाम्रा मौलिक चाड पर्वहरुको संरक्षण र संबद्र्धन हामी सबैको साझा दायित्व हो ।”

सभामुख सापकोटाले शुभकामना दिदैं २८५७ औं सोनाम ल्होछार र २१४८ औं ग्याल्वो लोसारले शान्ति, मित्रता, सद्भाव र राष्ट्रिय एकता मजबुत बनाउन प्रेरणा मिल्ने विश्वास समेत व्यक्त गरेका छन् ।