मेलम्ची क्षेत्रमा प्रधानमन्त्रीको अवलोकन

२६ असार, मेलम्ची ।

बाढीको २५ दिनपछि प्रधानमन्त्री केपि शर्मा ओलीले सिन्धुपाल्चोकको मेलम्ची र हेलम्बु क्षेत्रको अवलोकन गरेका छन् । असार १ गते आएको बाढी पहिरोले हेलम्बु गाउँपालिका र मेलम्ची नगरपालिकामा ठुलो जनधनको क्षती भएपछि प्रधानमन्त्री ओलीले आज बाढिग्रस्त क्षेत्रको अवलोकन गरेका हुन् ।

बाढी प्रभावितसँग भेटघाट गरी ढाडस दिन ढिलोगरी सो क्षेत्र पुग्नुभएका प्रधानमन्त्री ओलीले हेलम्बु क्षेत्रका बाढी प्रभावितसँग भेटघाट गरेपनि मेलम्ची क्षेत्रमा भने कुनै पनि बाढी पीडितसँग भेट नगरी फर्कीएका थिए ।

यस्तो भयो हेलम्बुमा

काठमाण्डौबाट हेलीकप्टरमार्फत हेलम्बु गाँउपालिकाको किउल, गणेशे बगरमा पुग्नुभएको थियो । गणेशे बगरमा आएका बाढी पीडितसँग भेटेर छलफल गरेका थियो । हेलम्बु गाँउपालिकालाई मेलम्ची खानेपानी विकास समितिले दिएको १ करोड ५० लाख रुपैंया र मेलम्ची खानेपानी साउकाले दिएको १ करोड हस्तान्तरण गर्दै प्रधानमन्त्री ओलीले सरकार सँधै जनताको साथमा रहेको बताए । ‘तपाईंहरु अहिले ठुलो बिपत्तीमा हुनुहुन्छ, आफन्त र सम्पत्ति पनि गुमाउनु भएको यस्तो अवस्थामा धैर्य गर्नुको बिकल्प छैन ।’ तिनै तहका सरकार मिलेर क्षतीग्रस्त सबै संरचना पुनः पुरानै अवस्थामा फर्काउनको लागि आफुहरु प्रतिबद्ध रहेको समेत प्रधानमन्त्री ओलीले बताउनुभयो । उक्त कार्यक्रममा हेलम्बु गाँउपालिकाका अध्यक्ष निमा ग्याल्जेन शेर्पा भने उपस्थित भएका थिएनन् ।

आफुलाई ढिला गरी खबर आएकोले आफु सो कार्यक्रममा आउन नसकेको गाँउपालिका अध्यक्ष शेर्पाले बताए । गाँउपालिकाका अध्यक्ष वा कुनेै अरु जिम्मेवार प्रतिनिधि कार्यक्रममा उपस्थिती नभएपछि गाँउकार्यपालिका सदस्य लक्ष्मी सुनारले मेलम्ची खानेपानी विकास समितिले दिएको १ करोड ५० लाख रुपैंया र मेलम्ची खानेपानी साउकाले दिएको १ करोड रुपैंयाको चेक लिएका थिए ।

मेलम्चीमा के भयो ?

हेलम्बुबाट हेलीकप्टर चढेरै मेलम्ची फर्केका प्रधानमन्त्री ओली मेलम्चीमा रहेको कालीजंग गणको ब्यारेकमा उत्रीए । ब्यारेकबाट मेलम्ची बजारमा रहेका बाढी प्रभावितहरुसँग भेटघाट गर्ने योजना सहित गाडीको लस्कर लगाएर मेलम्ची बजार झरे । तर मेलम्ची बजारमा बाजारबसीले ढिला गरी अवलोकनमा आएको र नगरपालिकाले समेत केही नगरेको आक्रोस पोख्ने डर सुरक्षा निकाएलाई परेको थियो । सोही डरका कारण आफ्नो स्वास्थ्य अवस्था त्यती राम्रो नभएको भन्दै प्रधानमन्त्री ओली बजारको बाटो घुमेर गाडीबाट नओर्लीकनै नगरपालिकाको कार्यालय हुँदै टारमा पुगेर केहीबेर मेलम्ची बजार र बाढी आएको नदी अवलोकन गरेका थिए । हेलम्बुमा बाढी प्रभावितसँग भेट गरेपनि ओलीले मेलम्ची बजारका बाढीपिडीतसँग भने भेट गरेनन् ।

हेलीकप्टरबाट मेलम्ची उत्रेका ओली गाडीमा मेलम्ची बजार घुमेर कडा सुरक्षाका विच केहीबेर बजार र नदी हेरेर पुनः सैनीक ब्यारेक फर्कीएका थिए । सैनीक ब्यारेकमा आयोजित औपचारीक कार्यक्रममा प्रधानमन्त्री ओलीले बाढीले क्षतिग्रस्त घर, बिद्यालय, लगायत सबै संरचना छिटो निर्माण हुने भन्दै सगै आएका यातायात मन्त्री वसन्त नेम्वाङ लाई निर्माण कार्य थाल्न निर्देशन दिएका थिए । बाढीबाट बिस्थापितलाई अस्थायी आवसका लागि १५ सय बण्डल जस्ता र प्रति परिवार नगद ५० हजार तत्काल प्रदान गर्ने प्रधानमन्त्री ओलिले बताए । गत बर्ष गठन गरेको बिपद जोखीम न्युनिकरण प्राधिकरण मार्फत तोकिएको मापदण्डअनुसार यस क्षेत्रका पीडितलाई आवस निर्माणकार्यका लागि रकम प्रदान गरिने प्रधानमन्त्रीले जानकारी दिए ।

प्रधानमन्त्री सगै भौतिक यातायात मन्त्री वसन्त नेम्वाङ ,प्रधानमन्त्री पत्नी राधिका शाक्य ,पुर्व मन्त्री शेरबहादुर तामाङ, दावा तामाङ, गृह सचीव लगायत सरकारी अधिकारीहरु हेलम्बु क्षेत्रमा आएका थिए । प्रधानमन्त्री ओलीले मेलम्ची नगरपालिकालाई मेलम्ची खानेपानी विकास समितिले दिएको ५० लाख रुपैंया र मेलम्ची खानेपानी साउकाले दिएको ६० लाख रुपैंया हस्तान्तरण गरिएको थियो ।