कति आयो नेपालमा कोरोना खोप ?

१३ असोज, काठमाण्डौ ।

कोरोना महामारीबाट सुरक्षित गराउने एक मात्र विकल्पको रुपमा हेरिएको कोरोना विरुद्धको खोप नेपालमा पनि गत फागुनदेखि नै लगाउन थालिएको छ । नेपालका हालसम्म १ करोड ७८ लाख डोज भन्दा धेरै खोप भित्रिएको सरकारी तथ्याङ्क छ ।

स्वास्थ्य तथा जनसंख्या मन्त्रालयको तथ्याङ्क अनुसार नेपालमा हालसम्म १ करोड ७८ लाख ५८ हजार ७१० डोज खोप प्राप्त भएको छ । जसमध्ये सबैभन्दा धेरै भेरोसेल खोप प्राप्त भएको छ । भेरोसेल खोप नेपालमा १ करोड, १९ लाख डोज प्राप्त भएको छ । यो चिनियाँ खोप हो । यसको दुई डोज लगाउनुपर्छ ।

त्यस्तै कोभिसिल्ड खोप समेत २४ लाख ४८ हजार डोज प्राप्त भएको छ । नेपालमा पहिलोपटक यही खोप भित्रिएको थियो । यसको समेत दुई डोज नै लगाउनु पर्दछ । यो भारतीय खोप हो । । कोभिसिल्ड को खोप अभाव भएपछि पहिलो डोज कोभिसिल्ड लगाएका ६५ वर्षमाथिका ज्येष्ठ नागरिकलाई जापानबाट आस्ट्राजेनेका खोप ल्याएर लगाएको थियो । यो खोप भने नेपालमा १९ लाख ७५ हजार ८६० डोज भित्रिएको मन्त्रालयले जनाएको छ ।

एक डोज मात्रै लगाए पुग्ने अमेरिकी कम्पनीले उत्पादन गरेको जोनसन एण्ड जोनसन खोप भने १५ लाख ३४ हजार ८५० डोज भित्रिएको छ ।

प्राप्त खोपहरू केही सरकारी सहयोगको रुपमा निशुल्क प्राप्त भएका हुन् भने केही सरकारले खरिद गरेर ल्याएको हो ।