मालिकादेवी कप आजबाट शुरु

२० असोज, मेलचौर ।

प्रथम मालिकादेवी कप फुटबल प्रतियोगिता आज शुरु भएको छ । चौतारा साँगाचोकगढी नगरपालिकाका मेयर अमानसिं तामाङले सो कार्यक्रमको उद्घाटन गरेका हुन् ।

प्रतियागितामा पहिलो दिन ४ वटा खेल भएका छन् । पहिलो खेलमा माउन्ट एभरेष्ट क्लबको विरुद्ध नेपाने युथ क्लबले जित निकालेको छ । शून्यका विरुद्ध २ गोल गर्दै नेपानेले एभरेष्टलाई पराजित गरेको हो । नेपानेका लागि रोजल सापकोटा र प्रविन नेपालले एकएक गोल गरेका थिए । खेलको म्यान अफ दि म्याच पनि नेपानेकै सुजन तामाङ घोषीत भएका छन् ।

प्रतियोगिताको दोस्रो खेल रानीपोखरी युवा क्लब र साँगाचोक युथ क्लबविच भएको थियो । जसमा १ गोलको विरुद्ध २ ले साँगाचोक युथ क्लबले जित निकालेको छ । रानीपोखरीको लागि आत्मघाती गोल भएको थियो भने साँगाचोकको लागि सुन्दर श्रेष्ठ र शिखर रानाले गोल गरेका थिए । सो खेलका म्यान अफ द म्याच साँगाचोककै नबिन गिरी घोषीत भए ।

तेस्रो खेल गिदाने युथ क्लब र जुनीयर १० विच भएको थियो । निर्धारीत समयमा कुनै गोल हुन नसकेपछि टाइब्रेकरमा ४-२ गोलले गिदाने युवा क्लब विजयी भएको छ । सो खेलको म्यान अफ द म्याच भने गिदानेका समिर श्रेष्ठले प्राप्त गरे ।

आजको अन्तीम तथा चौथो खेल चौतारा साँगाचोकगढी ४ र जागरण समाज, छापविच भएको थियो । वडा नं. ४ का लागि एक गोल आत्मघाती गोल भएको थियो भने सोनाम तामाङले एक गोल गरी २-० गोल अन्तरले चौतारा साँगाचोकगढी ४ विजयी भएको छ । सो खेलको म्यान अफ द म्याच इश्वर तामाङ चुनिए ।