चट्याङको सिजन शुरु, यसरी जोगिन सकिन्छ

२१ चैत, काठमाडौं ।

चैतदेखि जेठ महिनासम्म अत्यधिक रुपमा चट्याङ पर्ने गर्दछ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले यो वर्ष पनि चट्याङको जोखिम सुरु भइसकेको भन्दै सावधानी अपनाउन अनुरोध गरेको छ ।

गत शनिबार राति पानीसँगै परेको चट्याङबाट ताप्लेजुङमा एक युवकको मृत्यु भएको थियो भने भोजपुरमा दुईजना बेहोस समेत भएका थिए । चारवटा घरको गारो चर्किएको प्राधिकरणले जनाएको छ । चट्याङबाट जोगिन विभिन्न उपायहरू अपनाउन सकिने गृह मन्त्रालयअन्तर्गतको विपद् जोखिम न्यूनीकरण तथा व्यवस्थापन प्राधिकरणले जनाएको छ ।
चट्याङ ठूलो मात्राको विद्युतीय करेन्ट हो । यसबाट हाम्रा घरहरूलाई धातुका सामग्री प्रयोग गरी सुरक्षित बनाउन सकिन्छ । तामा, आल्मुनियम तथा जीआईका रड घरको सबभन्दा अग्लो भागमा राख्ने अनि सोही धातुका रड वा पाता जोडेर जमिनसम्म पु¥याउने र तामाको रडसँग जोडी अर्थिङ गरिए धेरै हदसम्म घरहरू सुरक्षित हुने प्राधिकरणले बताएको छ ।

यस्तै, चट्याङबाट सुरक्षित रहन गड्याङगुडुङका बेला घरबाट बाहिर ननिस्कने र घरबाहिर भएमा तुरुन्त घरभित्र वा सुरक्षित स्थानमा जानुपर्छ । प्राधिकरणका अनुसार चट्याङबाट जोगिन पक्की घर, बस, भ्यान आदि सुरक्षित स्थान हुन् । तर, यस्ता सुरक्षित स्थान पुग्ने अवस्था नरहेमा अग्लो र एक्लो रुखको ओत लाग्न नहुने प्राधिकरणले जनाएको छ । बरु, रुखदेखि टाढा टुक्रुक्क बस्नुपर्छ । खुला चौरमा परेमा टुक्रुक्क बसी टाउकोलाई दुई घुँडाको बीच राखी कान थुन्नुपर्ने प्राधिकरणको सुझाव छ ।

प्राधिकरणका अनुसार घरभित्र रहँदा पनि झ्याल, ढोका बन्द गरी कोठाको बीचमा बस्नुपर्छ । टीभी, वासिङ मेसिन, फ्रिज तथा अरू विद्युतीय सामग्रीका तारहरू प्लगबाट छुटाउनुपर्छ । यस्तै, गड्याङगुडुङका बेला पानीका स्रोतमा सिधै नुहाउने, धुने नगर्ने र टेलिफोनमा कुरा गर्न नहुने प्राधिकरणले जनाएको छ ।

“सबैभन्दा महत्त्वपूर्ण कुरा चट्याङ अपराह्न ३ बजेपछि पर्ने हुनाले घरबाहिरका काम बिहानको समयमा गरी साँझपख घरभित्रका काम गर्नुपर्छ,“ प्राधिकरणले भनेको छ, “चट्याङ चैतदेखि जेठ महिनामा अत्यधिक पर्छ । सोहीअनुसार उच्च सतर्कता अपनाउनुपर्छ ।“