छोटो मार्गले जोडिदै काठमाण्डौ–चौतारा

२८ चैत, चौतारा ।

सिन्धुपाल्चोकको सदरमुकाम चौताराबाट काठमाण्डौ जोड्नेमध्येको छोटो दुरीको सडक स्तरोन्नति हुन थालेपछि स्थानीय हर्षित भएका छन् । आँगनकै सडक कालोपत्रे भई छोटो दूरीमै देशको राजधानी पुग्न सकिने र स्थानीय उत्पादनले पनि सजिलै वजार पाउने भएपछि उनीहरु खुसी भएका हुन् ।

करिब ५८ किलोमिटर दूरीमा काठमाण्डौको चाबहिल पुग्न सकिने गरी बागमती प्रदेश सरकारको लगानीमा सडक चौडा गरी पक्की नाली र कालोपत्रेको काम भइरहेको छ । सडक स्तरोन्नतिको पहिलो चरण अन्तर्गत चौतारा–झ्याडी खण्डमा सडक बनाउने काम करिब ८० प्रतिशत सम्पन्न भइसकेको छ । दोस्रो चरण अन्तर्गतको झ्याडी–देउराली खण्डको पनि काम सुरुवात गरी खन्ने काम सकिएर नाला बनाउन थालिएको पूर्वाधार विकास कार्यालय, चौताराका कार्यालय प्रमुख एवम् सिनियर इन्जिनियर राजु श्रेष्ठले बताए । चौतारा झ्याडी खण्डमा अब करिब १० दिनभित्र कालोपत्रे बिच्छ्याउने काम शुरु हुने उनले बताए ।

सडक स्तरोन्नति भएपछि यहाँको बिरामीलाई उपचारको लागि काठमाण्डौ लैजान, स्थानीयस्तरमा उत्पादन भएका कृषि सामग्री बजार पु¥याउन र बजारबाट अत्यावश्यक सामाग्री गाउँ ल्याउन समेत सहज हुनेछ । यसबाट आफ्नो उत्पादनले समयमै बजार पाउँदा उचित मूल्य समेत प्राप्त हुने र बजारका सामान समेत कम मूल्यमा आफ्नो ठाउँमा आइपुग्ने स्थानीयको अपेक्षा छ । इन्द्रावती गाँउपालिका–७, सिपापोखरेकी विष्णुमायाँ विश्वकर्मा बर्खामा मानिस हिड्‌न समेत सकस हुने सडक कालोपत्रे भएपछि बिरामीले यातायात असहजताकै कारण ज्यान गुमाउनु नपर्ने बताइन् ।

यो सडकलाई बागमती प्रदेश सरकारले प्रदेशस्तरिय सडकको रुपमा राखेको छ । प्रदेशका सिन्धुपाल्चोक सहित काभ्रे र काठमाण्डौलाई जोड्ने छोटो सडक भएकोले यसले कम लगानीमा स्थानीयको लागि ठुलो उपलब्धि हुनेछ । बिना मुआब्जा स्थानीयले स्वेच्छिक जग्गा दान गरी सडक चौडा गरिएको छ । यसअघि हिँउदमा मात्रै सवारीसाधन चल्ने सडकमा अब भने बाह्रैमास गाडी चल्दा स्थानीयको आयआर्जनमा समेत वृद्धि हुने अपेक्षा गरीएको छ ।

पहिले खण्डमा २५ करोड ६६ लाखमा १० किलोमिटर सोवर्ण निर्माण सेवाले र दोस्रो खण्डमा २९ करोड ४९ लाखमा १४ किलोमिटर प्यासीफीक इन्जिनियरिङ प्रा.लि.ले सडक निर्माण गर्नेगरी ठेक्का सम्झौता भएको छ । काभ्रेतर्फ पनि निर्माण कार्य धमाधम भइरहेको छ । सडक केन्द्रबाट दाँयाबाँया ४/४ मिटर बाटो वढाइएकोले सडक चौडा भएको छ । कुल ८ मिटरमध्ये ६ मिटर सडक कालोपत्रे हुनेछ भने बाँकी भाग नाली र पैदलयात्रुको लागि छुट्याएको छ । शुरुमा केही ढिला गरी काम भएको भए पनि अहिले भने कामले तिव्रता पाँउदा स्थानीयमा आशा पलाएको छ ।

यो सडक निर्माणसँगै चौाराबाट धुलीखेल हुँदै ८७ किलोमिटर लामो बाटो भएर काडमाण्डौ जानुपर्ने बाध्यता समेत हट्नेछ । जिल्लामा ग्रामीण सडकहरु धमाधम स्तरोन्नति भइरहँदा स्थानीयलाई आवतजावतमा निकै सहज हुनेछ । तर सो सडक निर्माण भइरहँदा स्थानीय उत्पादनमा जोड दिदै बजारीकारणबाट आयआर्जनमा टेवा पु¥याउने विषयमा पनि स्थानीय र सरकारले सोच्न जरुरी छ ।