यसरी २२ घण्टापछि सकुशल उद्दार भयो छाँगामा खसेका हेलम्बुका शिक्षकको

साथिहरुसँग नुहाएर फर्किने क्रममा सिन्धुपाल्चोकको हेलम्बु गाउँपालिका १, सर्कथलीस्थित छ्यादी खोलाले बगाएर बेपत्ता भएका शिक्षकको २२ घण्टापछि आइतबार जीवितै उद्धार गरिएको छ । हेलम्बु नाकाते नजिकैको छ्यादी खोलामा स्थानीय विद्यालयका शिक्षक साथीसहित नुहाउन गएका शिक्षक केशव सिवाकोटी शनिबार पुल नजिकैबाट चिप्लिएर लडेर खोलामा परेका थिए ।

दोलखा जिल्ला कालिञ्चोक गाउँपालिका ३ का सिवाकोटी हेलम्बु १ को सर्कथली आधारभूत विद्यालयमा पढाउँदै आएका थिए । सँगै गएको साथि चिप्लिएर लडेर छ्यादि खोलाको छाँगामा हराएपछी प्रत्यक्षदर्शी शिक्षक र स्थानीयले गाउँपालिका र प्रहरीलाई खबर गरेको हेलम्बु गाउँपालिकाका अध्यक्ष निमा ग्याल्जेन शेर्पाले बताए । सो खोला नजिकै मेलम्चि नदिमा मिसिएको हुनाले स्थानिय र प्रहरीले उनी मेलम्ची नदिमा पुगेर वेपत्ता भएको हुनसक्ने आँकलन गरेका थिए ।
मेलम्ची नदिको तल्लो तटिय क्षेत्रसम्म खोजि गर्दा पनि उनलाई नभेटेपछि मृत्यु भएको अनुमान गरिएको थियो । ‘छ्यादी खोलाको अप्ठ्यारो भूगोलमा ढुंगाको कापबाट उनलाई सकुशल उद्धार गरिएको छ‚’ अध्यक्ष शेर्पाले भने ।

शनिबार साँझसम्म पनि नभेटिएपछि आस मारेका स्थानीय र शिक्षकका परिवारले छ्यादी खोला भिरबाट आइतबार बिहान मान्छे चिच्याएको आवाज सुनेपछि सोही ठाउँमा रहेको अनुमान गरि उद्दारको काम शुरु गरिएको थियो । ‘बचाउ‚ बचाउ; गुहार, गुहार’ भन्ने आवाज बारम्बार सुनेको खबर पाएपछि गाउँपालिका अध्यक्ष शेर्पा तत्कालै नेपाली सेना, सशस्त्र प्रहरी बल, नेपाल प्रहरीसहित स्थानीय अगुवाजन र जनप्रतिनिधि उद्धारमा आवाज आएको छ्यादी भिरमा खटिएका थिए ।

शुरुमा हेलिकप्टरबाट डोरी खसालेर उनको उद्दार प्रयास गरिएको भएपनि त्यो सफल हुन सकेन । उनी गहिरो खोंचमा अड्किएको कारण हेलिकप्टरबाट उनको उद्दार गर्न सकिएको थिएन । त्यसपछि नेपाल प्रहरी , नेपाली सेना र सशस्त्र प्रहरीका तालिमप्राप्त खोजकर्ताहरूले डोरी लगाएर उनको सकुशल उद्दार गरिएको जिल्ला प्रशासन कार्यालय , सिन्धुपाल्चोकमा प्रमुख जिल्ला अधिकारी वेदनिधी खनालले बताए ।

उनलाई हेलिकोप्टरमार्फत उद्धार गरेर अहिले कठमाडौं लगिएको र अहिले अवस्था सामान्य रहेको जिल्ला प्रहरी कार्यालयका प्रहरी नायव उपरीक्षक शिव बुढाथोकीले बताए ।शिक्षकको जीवन बँचाएको भन्दै स्थानीय गाउँलेले सुरक्षाकर्मी, शिक्षकलाई दोसल्ला ओडाएर सम्मान गरेका थिए ।