जुगलमा सहिद तथा विपन्न परिवारको निशुल्क जीवन बिमा

सिन्धुपाल्चोकको जुगल गाउँपालीकाले विभिन्न जनआन्दोलनका सहिद परिवार, घाइते परिवार अति विपन्न तथा विपन्न ३० परिवारको निशुल्क जीवन बिमा गरेको छ । देशमै पहिलोपटक गाउँपालिकाले नै बिमालेख भुक्तानी गर्नेगरी उनिहरुको बिमा गरिदिएको हो ।

गाउँपालिका अध्यक्ष रेशम स्याङ्बोले गाउँपालिकामा निर्वाचित भएर पहिलो पदबहालीमा गरेको निर्णय बमोजिम रिलायवल नेपाल लाइफ इन्स्योरेन्स लिमिटेडबाट पहिलो चरणमा ३० जनाको १० बर्षे आवधिक जिवन बिमा गराएको हो । यसलाई हरेक बर्ष गाउँपालिकाले नै बिमालेख भुक्तानी गर्नेछ भने संख्या थप गर्दै १ सय जनाको बिमा गर्ने योजना रहेको अध्यक्ष स्याङ्बोले बताए । गाउँपालिका गाउँ कै सरकार भएकोले हरेक जनताको खुसिको लागि विभिन्न योजना बनाएर अगाडि बढिरहेको उनले बताए ।

गाउँपालिकाले ५ लाख रुपैयाँ विनियोजन गरेर सोही रकमबाट उनिहरुको बिमा गरिएको हो । यो कार्यक्रम देशकै पहिलो कार्यक्रम भएको र यस्तो कार्यक्रममा सहभागी भई आफुले सम्झौता गर्न पाएको आफुलाइ भाग्यमानी ठानेको गाउँपालीकाका प्रमुख प्रशासकीय अधिकृत प्रवेश बडुलालले बताए ।

बिमित व्यक्तिको बिमालेख समय भित्रै मृत्युु भएमा परिवारले १ लाख रुपैयाँ पाउनेछन् भने बिमालेख समय सकिएपछि ब्याज सहित सो रकम पाउनेछन् । त्यस्तै बिमावधी सकिएपछि पनि बिमितको मृत्युु भएपछि १ लाख रुपैयाँ किरिया खर्च पाउने र विभिन्न घातक रोग लागेमा १ लाख रुपैयाँ उपचार खर्च समेत पाउने इन्स्योरेन्सका चौतारा शाखा प्रमुख लक्ष्मण विस्टले बताए ।