मेलम्चीको जिल्लास्तरीय भलिबल प्रतियोगिताको विजेता बन्यो योङ्ग स्टार

बैशाख २५ गतेबाट मेलम्चीमा शुरु भएको जिल्ला स्तरीय भलिवल प्रतियोगिताको उपाधी सिन्धु योङ्ग स्टार ए मेलम्ची ९ ले हात पारेको छ । आज भएको फाइनल खेलमा मेलम्ची ७ दुवाचौरलाई ३–१ को सेटमा पराजित गर्दै योङ्ग स्टारले उपाधी जितेको हो । योङ्ग स्टारले दुवाचौरलाई २५–२० २५–१८ र २०–२५ र २५–१६ को सेटमा पराजित गरेको हो ।

प्रतियोगितामा प्रथम हुने टिमले २ लाख नगद हात पारेको छ भने दोस्रो हुने टिमले १ लाख रुपैयाँ जितेको छ । त्यस्तै बनकाली युवा समाज जुगलले तेस्रो स्थान हात पारेको छ । सृजनशिल युवा क्लव दुवाचौर छापलाई ३–२ को सेटमा पराजित गर्दै बनकाली तेस्रो भएको हो । उसले ७५ हजार रुपैयाँ नगद पाएको छ । विजेताहरुले नगदसँगै ट्रफि र प्रमाणपत्र प्राप्त गरे ।

मेलम्ची युवा क्लवको आयोजना तथा राम श्रेष्ठको प्रायोजनमा २५ गतेबाट सुरु भएको प्रतियोगिताको अनुशासित टिम मेलम्ची २ घोषित भयो भने बेस्ट डिफेन्डर सुसान गिरि, बेस्ट सर्बर मेलम्ची ७ का खेलाडी संगम तामाङ, बेस्ट सेटर योङ स्टारका राम गिरि, उत्कृष्ट नबोदितमा मेलम्ची ७ का सुरेश तामाङ , बेष्ट ब्लकरमा योङ स्टारका सुरज खड्का ,उत्कृष्ट स्पाइकर मेलम्ची ७ का रोशन तामाङ र प्रतियोगिताको उत्कृष्ट खेलाडीमा योङ स्टारका रमेश खतिवडा घोषित भएको प्रतियोगिताको सहजिकर्ता प्रकाश सापकोटाले बताए ।