काभ्रे र सिन्धुपाल्चोक सशस्त्र प्रहरीको संयुक्त विपद प्रतिकार्य अभ्यास

चाैतारा । काभ्रे र सिन्धुपाल्चोक सस्शत्र प्रहरीका बलले काभ्रे भुम्लु गाउँपालिकाको दोलालघाटमा संयुक्त विपद् प्रतिकार्य अभ्यास गरेको छ । सशस्त्र प्रहरी बल नेपाल नम्बर १५ गण हेडक्वाटर काभ्रे र सशस्त्र प्रहरीका वल नेपाल नम्बर १६ गण हेडक्वाटर सिन्धुपाल्चोकको आयोजनामा भुम्लु गाउँपालिकाको सुनकोशी नदीमा संयुक्त मनसुन विपद् प्रतिकार्य अभ्यास मनसुन एवम् विपदजन्य घटनामा आधारित कृतिम घटना अभ्यास गरिएको हो ।
मनसुन तथा अन्य विपद्का घटनामा खोज तथा उद्धार तथा विपद् प्रतिकार्यका लागि अपनाउनु पर्ने पूर्व तयारीका लागी भारी वर्षातका कारण बाढी आउँदा खोलाले बगाएका ब्यक्तिलाई उद्धार,विपदमा खटिएको सुरक्षा फौजको टिम नै असुरक्षित भएको अवस्थामा कसरी उद्धार गर्न सकिन्छ भन्ने विपदजन्य घटनामा आधारित कृतिम घटना अभ्यास गरिएको थियो ।
जिल्ला समन्वय समिति काभ्रेका उपप्रमुख रिम बहादुर तामङले जिल्लामा हुन सक्ने विपद्को अभ्यासले नागरिकहरुलाई थप हौसला प्रदान गरेको बताए ।
मनसुन महिनामा जिल्लामा हुन सक्ने विपद्का घटनाहरुको न्यूनीकरण तथा पूर्व तयारीका लागि जिल्ला स्थित सम्पूर्ण सरोकारवाला निकायहरुको संयुक्त प्रयासमा अभ्यास मनसुन आयोजना गरिएको विपद् व्यवस्थापन जिल्ला समितिका प्रमुख एवं प्रमुख जिल्ला अधिकारी पुण्यविक्रम पौडेलले जानकारी दिए ।
भुम्लु गाउँपालिका अध्यक्ष प्रेम भुजेलले स्थानीय सरकारसँग बजेट भए पनि विपद्का लागि आवश्यक सीप, जनशक्ति र सामाग्री समेत नहुने भएकाले वडा स्तरमा यस्ता अभ्यास र तयारी आवश्यक रहेको बताए ।
सशस्त्र प्रहरी बल, नेपाल नम्बर १५ गण हेडक्वाटर काभ्रेका प्रमुख एसपी अच्युतप्रसाद मजगैयाले काभ्रे जिल्लामा विगतमा भएका विपद्बाट पाठ सिक्दै मनसुनमा हुन सक्ने विपद्का बारेमा तयारी गर्न अभ्यास महत्त्वपूर्ण भएको बताएका थिए ।
जिल्लामा हुन सक्ने विपद्को पहिचान गरी त्यसको अभ्यास गरिएको सशस्त्र प्रहरी बल, नेपाल नम्बर १५ गण हेडक्वाटर काभ्रेका प्रमुख एसपी रबि केसीले बताए ।
अभ्यास अवलोकनका लागि जिल्ला समन्वय समितिका पधादिकारी जिल्ला स्थित सुरक्षा निकायका प्रमुख तथा प्रतिनिधिहरु, जिल्ला स्थित विभिन्न कार्यालयका प्रमुखहरु र स्थानीयहरुको सहभागिता रहेको थियो ।