क्यालेन्डर वितरण गर्दै भदौरे गणेशको साधारण सभा सम्पन्न

चौतारा साँगाचोकगढी नगरपालिका वडा नं. ७ स्थित भदौरे गणेश सामाजिक संस्थाको सातौं वार्षिक साधारणसभा सम्पन्न भएको छ । संस्थाले २०८१ सालको वार्षिक भित्तेपात्रो(क्यालेन्डर) वितरण गर्दै साधारणसभा सम्पन्न गरेको हो ।

संस्थाले सो क्षेत्रमा विभिन्न सामाजिक कार्य गर्दै आएको छ । चौतारा साँगाच‍ोकगढी नगरपालिका वडा नं. ७ का वडाध्यक्ष डम्बरबहादुर तामाङक‍ो प्रमुख आतिथ्य र पुर्व वडाध्यक्ष उमाप्रसाद दुलालको विशेष आतिथ्यमा सम्पन्न भएको साधारणसभामा नेपाली काँग्रेस , नेकपा एमाले र राष्ट्रिय प्रजातन्त्र पार्टीका वडा समितिका प्रमुखहरूले शुभकामना व्यक्त गरेका थिए ।

संस्थाले चौतारा-सिपाघाट सडकको किनारामा सौन्दर्यात्मक बिरुवा रोप्ने, फोहोरको लागि डस्टविन राख्ने तथा सडकबत्ती समेत राख्ने कार्य सम्पन्न गरिसकेको छ । साधारणसभाको अवसरमा संस्था वार्षिक प्रगति प्रतिवेदन अध्यक्ष विनोदकुमार श्रेष्ठले र आर्थिक प्रतिवेदन कोषाध्यक्ष गौरव श्रेष्ठले पेश गरेका थिए ।

ती प्रतिवेदन उपर संस्थाका पुर्व अध्यक्ष रविन गौतम, राप्रपाका खिलबहादुर रानामगर, एमालेका यज्ञनाथ दुलाल, मालिकादेवि सामुदायिक सिकाई केन्द्रका अध्यक्ष यज्ञप्रसाद दंगालले आफ्नो सुझाव पेश गरेका थिए ।