अत्याधिक मापसे गरि शिक्षक कुट्ने सापकोटा पक्राउ

साँझको समयमा अत्याधिक मादक पदार्थ सेवन गरि विद्यालयमा प्रवेश गरि शिक्षकहरूमाथि हातपात गर्ने मनोज सापकोटा भनिने मोहनप्रसाद सापकोटा पक्राउ परेका छन् ।

सापकोटाले चौतारा साँगाचोकगढी नगरपालिका ५ स्थिति श्री कृष्ण रत्नगंगा माद्यामिक विद्यालयमा प्रवेश गरि तिनजना शिक्षकहरू हरिगोपाल श्रेष्ठ , राजेन्द्र श्रेष्ठ र राजु पराजुलीमाथि अपशब्द प्रयोग गर्दै हातपात गरेको जिल्ला प्रहरी कार्यालय, सिन्धुपाल्चोकका प्रहरी नायव उपरीक्षक निरञ्जन भट्टराईले बताए ।

सापकोटा समेत स्थायी शिक्षक हुन् । सेतिदेवी मावि, स्याउलेका प्रधानाध्यापक समेत रहेका सापकोटा गत हप्ता मात्रै वनदेवी मावि, चौतारा सरुवा भएका थिए । उनकी श्रीमती सरस्वती घिमिरे कृष्ण रत्नगंगामै अध्यापन गर्छिन् । शिक्षीका घिमिरे विद्यालयकै अर्को कोठामा रहेकै समयमा सापकोटाले तीन जना शिक्षक माथि हातपात गरेको प्रहरीले जनाएको छ ।

सापकोटालाई पक्राउ गरि प्रहरी नियन्त्रणमा लिँदा प्रहरीमाथि पनि अभद्र व्यवहार र अपशब्द प्रयोग गरेको प्रनाउ भट्टराईले बताए । पिडीत शिक्षकहरूको उजुरी पछि थप कारबाहीको प्रकृया अगाडि बढाईने प्रहरीले बताएको छ ।

सापकोटा सिन्धुपाल्चोक जिल्लाबाट सञ्चालन हुने फरकपत्रीका अनलाइनका सम्पादक समेत हुन् ।