प्रचण्डले चनौटेमा भने—‘देशको अर्थतन्त्रमा गंम्भिर समस्या छ’

प्रधानमन्त्री पुष्पकमल दाहाल प्रचण्डले नेपालको अर्थतन्त्रमा केही गम्भीर समस्या रहेको र आफुले तेस्रो कार्यकालको प्रधानमन्त्रीको जिम्मेवारी सम्हालेको मन्त्रिपरिषदको पहिलो बैठकबाटै अर्थतन्त्रमा सुधार गर्ने अठोट लिएको बताए । शुक्रबार सिन्धुपाल्चोक जिल्लाको जुगल गाउँपालिका–५, चनौटेस्थित जनवादी गणतन्त्र चीनको सहयोगमा रत्नराज्य माध्यमिक विद्यालयको नवनिर्मित भवनको समुद्घाटन समारोहमा बोल्दै प्रधानमन्त्रीले उक्त कुरा बताएका हुन् ।

‘देशको सिंगो अर्थतन्त्रमा गंम्भिर समस्या आएको छ, तपाईहरुले केही कुरा सुन्नु भएकै होला ,मैले प्रधानमन्त्री बनेसँगै यी समस्या हल गर्ने अठोट लिएको छु, केही सकरात्मक संकेत पनि देखिएको पनि छ,’ प्रधानमन्त्री दाहालले स्थानीय माझ भने । यहाँको जनताको प्रत्येक विपद्का दुःखमा मलमपट्टी बनेर र पुनर्निर्माणका सुखमा म सँगै उभिएको र चीनको सिन्धुपाल्चोकलाई उपहारस्वरुप भव्य विद्यालय भवन दिनु सबैको लागि गौरव खुशीको कुरा भएको उनले बताए । ‘विद्यालय भवन बन्नुमा मेरो पनि धेरथोर भुमिका छ, त्यसैले शिक्षामा गुणस्तर नभइ विकासमा देश अघि बढ्दैन् ,यसमा सबैले जोड दिएर लाग्न जरुरी छ,’उनले भने ।

नेपालका लागि चिनिया राजदूत चेन सङले विद्यालय भवन प्रधानमन्त्रीमार्फत् समुदायलाई हस्तान्तरण गरेको जुगल गापाका अध्यक्ष रेशम स्याङ्बोले बताए । चिनिया राजदूत चेन सङले हिमालमुनी रमाउने नेपाली देखेर छक्क परेको र चीनले विद्यालयबाहेक अन्य विभिन्न भौतिक संरचना र पूर्वाधार पुनर्निर्माणमा सहयोग गरिरहेको बताए । ‘भूकम्प निर्दयी छ, तर नेपाल र चीनको प्रेम छ, त्यसैले हामीले प्रधानमन्त्रीलाई भेटेर यसरी सहयोगको बारेमा कुरा गर्न पाउनु सौभाग्यको कुरा हो,’ सेङले भने । विद्यालयबाहेक पुस्तौको नेपाल–चीनको सौहार्दपूर्ण सम्बन्ध स्थापना गर्न अनेक कार्यक्रम अघि बढाउने चीनको अठोट रहेको सेङले स्थानीयबीच सूचना दिए ।

चीनको एक अर्बभन्दा बढी लागतमा र्निर्मित विद्यालयको अत्याधुनिक सुविधायुक्त ६ वटा भवन चिनिया मोडेल छन् । भवन निर्माणमा बालुवा, गिटी र ढुंगा मात्रै नेपालको छ, अन्य सबै चीनबाटै ल्याएर चिनिया मजदुरबाट बनाइएको हो । सन् २०१७ जनवरीमा सुरु भएर २०१९ डिसेम्बरमा निर्माण सकिएको विद्यालय भवन तत्कालिन चिनिया राजदूत होउ यान्छी हुदा राष्ट्रपति विद्यादेवी भण्डारीले उद्घाटन गर्ने तय भएको थियो । तर समय नमिलेपछि तीन वर्षपछि प्रधानमन्त्री दाहालले उदघाट्न गरेका हुन् ।