बाह्रबिसेमा सुटिङ हुने ‘कार्साङ’मा दयाहाङ र बुद्धि अनुबन्धित

सिन्धुपाल्चोकको बाह्रबिसे नगरपालिका र भोटेकोशी गाउँपालिकामा सुटिङ हुने चलचित्र ‘कार्साङ’मा मुख्य कलाकारको रुपमा दयाहाङ राई र बुद्धि तामाङ अनुबन्धित भएका छन् ।

यार्सा फिल्मस् को ब्यानरमा निर्माण हुन लागेका फिल्ममा यम शेर्पाको निर्देशन रहनेछ । निर्देशक शेर्पाको यो डेब्यु निर्देशकीय फिल्म हो । यसअघि उनले थुप्रै सर्ट फिल्मको निर्देशन गरिसकेका छन् । पुरुषोत्तम प्रधानको छायांकन रहने फिल्ममा उनी निर्माताका रुपमा पनि जोडिएका छन् ।

फिल्मको ९० प्रतिशत छायांकन बाह्रबिसे नगरपालिका ६ र बाँकी भोटेकोसीमा हुने निर्माण पक्षले जनाएको छ । सामाजिक कथामा बन्ने फिल्ममा अन्य कलाकार तथा प्राविधिक चाँडै फाइनल गरिने निर्देशक शेर्पाले बताए । फिल्मका बाँकी कलाकार अडिसनमार्फत छनोट गरिनेछ ।

फिल्मकी प्रमुख अभिनेत्री को हुने भन्ने बारे निर्माण पक्षले केही खुलाएको छैन । यो फिल्ममा दयाहाङ अनुबन्धित भएसँगै विदेशबाट ओभरसिज राइट्सका लागि माग बढिरहेको निर्माण पक्षको दाबी छ । फिल्मको छायांकन तिहार लगतै गरिने बताइएको छ ।