गैरजिम्मेवार बन्दै जिसस प्रमुख

२० बैशाख, चौतारा ।

कोरोना महामारीको समयमा सबैभन्दा जिम्मेवार बन्नुपर्ने व्यक्ति नै गैर जिम्मेवार बनिदिँदा त्यसले समुदायमा पार्ने असर हामी सबैले आँकलन गर्न सक्छौं । आम सर्वसाधारणले गर्न नसक्ने तर जिम्मेवार व्यत्तिले गर्नसक्ने काम उनैले नगरिदिँदा सिन्धुपाल्चोक जिल्ला यतिखेर कोरोना संक्रमणको उच्च जोखीममा रहेको छ ।

अन्य कार्यक्रम तथा अवसरहरुमा जिल्लाको सबैभन्दा उच्च पदस्थ व्यक्ति म हुँ भन्दै अगाडी आउने जिल्ला समन्वय समिति सिन्धुपाल्चोकका प्रमुख कृष्णगोपाल तामाङको गैरजिम्मेवारीका कारण यतिखेर सिन्धुपाल्चोकमा कोरोना संक्रमितलाई राख्नको लागि आइसोलेशन समेत निर्माण हुन सकेको छैन । जिल्ला कोभिड १९ संकट व्यवस्थापन समितिको वैठकमा प्रमुख जिम्मेवारीका साथ सहभागी हुने तामाङ आफ्नो जिम्मेवारीमा केही काम आएपछि मौन बस्ने गरेका छन् भने उनी आफैं सरकारले तोकेको मापदण्डलाई लात हान्दै ठुला भेला गर्दै हिडेका छन् ।

आइसोलेशन बनाउन मौन

केही दिन अघि बसेको डीसीसीएमसीको बैठकमा आइसोलेशन वार्ड तयार गर्न भवन खोजी गर्ने विषयमा भएको छलफलमा उनी मौन बसे । उनी मौन बस्नुको कारण पनि उनीसँग सम्बन्धित भवनको प्रस्ताव आउनु हो ।

हाल जिससले भोगचलन गरिरहेको नयाँ पक्कि भवनमा अघिल्लो वर्षको कोरोना महामारीमा आइसोलेसनको रुपमा प्रयोग गरिएको थियो । सो भवन आइसोलेसनमा प्रयोग गरिरहँदा जिससको काम कारवाहीसँगै रहेको प्रीफ्याब भवनबाट भइरहेको थियो । कोरोनामा महामारी केही सहज भएर अवस्था सामान्य बनेपछि आइसोलेसन हटाएर नयाँ भवनमा जिससको कार्यालय र जिल्ला आयोजना कार्यान्वयन इकाइ(निजी आवास तथा अनुदान व्यवस्थापन) को कार्यालय सञ्चालन भइरहेको छ । जिसस नयाँ भवनमा सरेपछि साविक सञ्चालमा रहेको प्रीफ्याबको भवन अहिले खाली छ ।

सो खाली रहेको भवनमा आइसोलेशन वार्ड निर्माण गर्ने वैठकको प्रस्तावमा उनै जिसस प्रमुख तामाङ मौन बसेका हुन् । उनी मौन बसेपछि उनकै मातहतमा रहेको सो भवन आइसोलेशन वार्डको रुपमा प्रयोग गर्ने बारे निर्णय हुन सकेन । त्यसकै कारण यो समाचार तयार पार्दासम्म कुल ८६ संक्रमित मध्ये १ जना मात्रै चौतारा अस्पतालको आइसोलेशनमा छन् भने बाँकी ८५ जना जोखीम मोलेर आफ्नै घरमा बसीरहेका छन् ।

जिल्लामा कन्ट्याक ट्रेसिङबाट नयाँ संक्रमित थपिने दर उच्च छ । यदि संक्रमितलाई सुरक्षीत आइसोलेशनमा राख्न सकिएको भएको समुदायमा संक्रमण फैलिने दर कम हुने थियो । जिससको सो भवन आइसोलेशन बनाउन तामाङ तयार नभएपछि खाली जग्गामा टेन्ट हालेर आइसोलेशन बनाउने तयारी भइरहेको वैठकमा सहभागी एक सदस्यले बताए ।

भेला गर्दै हिड्दै

आफै सहभागी भएको वैठकमा स्वास्थ्य मापदण्ड कडाइका साथ लागु गर्ने भनि निर्णय गरेका तामाङले सो आफ्नै निर्णयलाई लात हान्दै भेला गर्दै हिडेका छन् । तामाङ आफै प्रमुख अतिथि भएर मेलम्ची नगरपालिकाका मेयर, उपमेयर लगाएत उपस्थित गराएर उनले सयौं कार्यकर्ता भेला गराएका छन् । नेपाल कम्युनिष्ठ पार्टी(एमाले)को मेलम्ची नगरपालिका ९ को अगुवा कार्यकर्ता भेलामा आइतबार उनी सहभागी भएका हुन् । कार्यकर्ता भेला भनिएपनि ज्यामीरेका विभिन्न विद्यालयका प्रधानाध्यापक तथा शिक्षकहरु जम्मा गरेर एक विद्यालयको प्रअको घरमा सो भेला गरिएका हो ।

भेलामा एक सयको हाराहारीमा मानिस भेला भएको भेलामा सहभागी माधव नेपाल समुहका एक कार्याकर्ताले खुल्लापानालाई बताए । सरकारले भेला तथा सम्मेलन नगर्न तथा गर्नेपरे २५ जना भन्दा बढी भेला नगर्ने निर्णय गरेका भएपनि जिल्लाका अगुवाले नै सो निर्णय तोडेका हुन् ।