जनताले लत्याएका व्यक्तिलाई पार्टीले पत्याएर सांसदमा सिफारिस

आँउदो मंसिर ४ गते हुने प्रतिनिधिसभा तथा प्रदेशसभा निर्वाचनका लागि अहिले दलहरूबीच उम्मेदवार सिफारिस गर्ने रस्साकस्सी चलेको छ । क्रियाशील तीनवटै ठूला दलहरूले गत बैशाख ३० गते सम्पन्न स्थानीय तह निर्वाचनमा जनताले लत्याएका उम्मेदवारहरू समेत सिफारिस गरेका छन् ।

जिल्ला समन्वय हारेर समानुपातिक सांसदमा सिफारिस

चौतारा साँगाचोकगढी नगरपालिकाको नगर कार्यपालिका सदस्य निर्वाचित माओवादी नेता गणेश विक जिल्ला समन्वय समिति, सिन्धुपाल्चोकको प्रमुख पदमा उम्मेद्वार भएका थिए । नेपाली काँग्रेस र नेकपा एसको गठबन्धनका प्रमुख पदका उम्मेदवार बालकृष्ण श्रेष्ठका विरुद्ध एमाले माओवादी गठबन्धनबाट प्रमुख पदमा उम्मेदवार बनेका विक सो पदमा पराजित बनेपछि उनलाई पार्टीले अहिले दलित कोटाबाट प्रतिनिधि सभा १ मा समानुपातिक उम्मेदवार बनाएको छ । उनी वडा सदस्यको उम्मेदवार नै नबनी पार्टी सिफारिसमै नगर कार्यपालिका सदस्य बनेका हुन् ।

इन्द्रावतीमा अध्यक्ष हार्नेहरू दुवै जना सिफारिसमा

स्थानीय तह निर्वाचन २०७९ मा सिन्धुपाल्चोकको इन्द्रावती गाउँपालिकाको अध्यक्ष पदमा नेकपा एमालेका झम्कनाथ नेपालले ७ हजार १२४ मत ल्याएर विजयी भएका थिए । उनीसँगै पराजित हुने नेपाली काँग्रेस, सिन्धुपाल्चोकका निवर्तमान सभापति विकास लामाले ६ हजार १५२ मत पाँउदा अहिले सिन्धुपाल्चोक प्रतिनिधिसभा २ को पार्टीबाट समानुपातिक पदको उम्मेदवारको रुपमा सिफारिस भएका छन् । सो पालिकामा नेकपा (माओवादी केन्द्र) बाट अध्यक्ष पदमै उम्मेदवार बनेका ठूलोबाबु श्रेष्ठ समेत सिन्धुपाल्चोक प्रतिनिधिसभा २ को समानुपातिक पदको उम्मेदवारको रुपमा सिफारिस भएका छन् ।

पालीका हार्नेहरू प्रदेश समानुपातिकमा सिफारिस

भोटेकोशी गाउँपालिकामा नेकपा माओवादी केन्द्रबाटै अध्यक्ष पदमा उम्मेदवार बनेका राजकुमार पौडेल समेत प्रतिनिधिसभा १ को प्रदेश क मा समानुपातिक तर्फ उम्मेदवार सिफारिसमा परेका छन् । एक कार्यकाल भोटेकोशी गाउँपालिकाको अध्यक्ष बनिसकेका पौडेललाई दोस्रो कार्यकालका लागि भने जनताले पत्याएनन् । जनताले लत्याए पनि पैसा र पहुँचको आधारमा उनलाई पार्टीले पत्याएको छ । पौडेलले १ हजार ९१८ मत ल्याँउदा नेपाली कांग्रेसका पासाङ नोर्बु शेर्पाले २ हजार ६०५ मत ल्याएर विजयी भएका थिए ।

बाह्रबिसे नगरपालिकामा माओवादी केन्द्रबाट उपप्रमुख पदमा उम्मेदवार रहेकी पातली थामी (पार्वती) पनि प्रतिनिधि सभा १ को समानुपातिक उम्मेदवार सिफारिस भएकी छिन् । अल्पसंख्यक कोटाबाट सिफारिसमा परेकी थामीले १ हजार २५९ मत ल्याएर तेस्रो हुँदा नेपाली काङ्ग्रेसकी मन्जु तामाङले ६ हजार ९७७ मत ल्याएर विजयी भएकी थिइन् ।

नेकपा एमाले प्रतिनिधिसभा २ क्षेत्रीय समितिले भने पार्टीको नीति विपरित निमफुञ्जो शेर्पालाई प्रतिनिधिसभा १ को प्रदेश क मा सिफारिस गरेको छ । २०७९ को स्थानिय निर्वाचनमा उम्मेदवार भएकालाई मंसिरमा हुने निर्वाचनमा उम्मेदवार नबनाउने पार्टीको नीति भएपनि शेर्पालाई खुसी बनाउनै सिफारिस गरेको छ । शेर्पा बाह्रबिसे नगरपालिकाका निवर्तमान प्रमुख हुन् । सो पदमा पुनः फर्कीने उनको चाहना नेपाली कांग्रेसका बालकृष्ण बस्नेतले चकनाचुर पारिदिएका थिए । बस्नेतले ७ हजार ७२८ मत ल्याएर शेर्पालाई ५ हजार ४३३ मतमा खुम्चाएर पराजित गरेका थिए ।

वडामा हार्नेहरू पनि सांसद सिफारिस

सुनकोशी गाउँपालिका वडा नं. ६ को नेपाली कांग्रेसबाट वडाध्यक्ष पदमा नेकपा एमालेका चक्रबहादुर बस्नेतसँग पराजित काँग्रेस नेता रामकुमार थापा प्रतिनिधि सभा १ को प्रदेश ख मा समानुपातिक उम्मेदवार सिफारिस भएका छन् । बस्नेतले ७१२ मत ल्याँउदा थापाको ६६० मत मात्रै आएको थियो । मेलम्ची नगरपालिका १ मा वडाध्यक्ष पदमा उम्मेद्वार भइ चौथो लोकप्रिय मत ल्याएका चित्रकुमार चौलागाईं (सिके) समेत प्रतिनिधिसभा २ को प्रदेश ख मा समानुपातिक उम्मेद्वार सिफारिस भएका छन् । चौलागाईंको २९६ मत ल्याँउदा एमालेका कृष्णमुरारी चौलागाईंले ८३४ मत ल्याएर विजयी भएका थिए ।

काँग्रेसबाटै प्रतिनिधि सभा २ को प्रदेश ख मा समानुपातिक उम्मेदवार सिफारिस भएका छिरीङ लामा समेत जनताबाट पराजित नेता हुन् । हेलम्बु गाँउपालिका ३ को निवर्तमान वडाध्यक्ष लामा अध्यक्ष पद दोहो¥याउन खोज्दा पछारीएका थिए । लामाले ६६० मत ल्याँउदा एमालेका दिपक खड्काले ७१२ मत ल्याएर पाँच बर्षको लागि वडाध्यक्ष पद सुरक्षीत गरेका थिए ।

चौतारा साँगाचोकगढी नगरपालिकाल वडा नं. ५ को वडाध्यक्ष पदमा नेकपा माओवादी केन्द्रबाट उम्मेद्वार बनेका थिए श्यामकृष्ण श्रेष्ठ । वडा सदस्यहरु चार जनै माओवादीकै उम्मेदवार विजयी हूँदा श्रेष्ठले भने आफ्नो पगरी जोगाउन सकेनन् । ९८५ मत ल्याएका उनी १ हजार १८४ मत ल्याउने नेकपा एमालेका शिव श्रेष्ठसँग पराजित बने । उनै श्यामकृष्ण श्रेष्ठ माओवादी केन्द्रबाट सिन्धुपाल्चोक प्रतिनिधि सभा २ को प्रदेश क मा प्रत्यक्ष तर्फको उम्मेदवार सिफारिस भएका छन् ।