नगरपालिका संघको उपाध्यक्षमा चौताराका सापकोटा

नेपाल नगरपालिका संघको उपाध्यक्षमा चौतारा साँगाचोकगढी नगरपालिकामा मेयर कृष्णप्रसाद सापकोटा चयन भएका छन् । देशभरबाट दलहरूले नगरपालिका प्रमुख तथा उपप्रमुख जितेको संख्याको आधारमा पद विभाजन हुँदा माओवादी केन्द्रको तर्फबाट सापकोटा संघको आठौं महाधिवेशनबाट ४३ सदस्यीय कार्यसमितिमा चयन भएका हुन् ।

संघको अध्यक्षमा धादिङको नीलकण्ठ नगरपालिकाका प्रमुख भीम ढुंगाना चयन भएका छन् । नेपाली कांग्रेसबाट निर्वाचित ढुंगाना सर्वसम्मत अध्यक्ष चुनिएका हुन् । संघको महासचिवमा नेकपा एमालेका तर्फबाट दाङको घोराही उपमहानगरपालिकाका मेयर नरुलाल चौधरी चयन भएका छन् । यस्तै उपमहासचिवमा काठमाडौं महानगरपालिकाकी उपप्रमुख सुनिता डंगोल चयन भएकी छिन् ।

कोषाध्यक्षमा नेपाली कांग्रेसबाट खोटाङको हलेसी तुवाचुङ नगरपालिकाकी प्रमुख विमला राई कोषाध्यक्ष र सहकोषाध्यक्षमा हेटौंडा उपमहानगरपालिकाकी प्रमुख एकीकृत समाजवादीकी मीना लामा चयन भएकी छन् ।

स्थानीय तहको निर्वाचन भएपछि पालिकामा जित हासिल गरेको पार्टीको संख्या अनुसार संघको भागवण्डा भएको हो । देशभरिका २ सय ९३ नगरपालिकाका जननिर्वाचित प्रतिनिधिबाट ५ वर्षको लागि नयाँ कार्यसमिति चयन भएको हो ।