सिन्धुपाल्चोकका ज्योतिषहरुको दोस्रो भेलाले नयाँ नेतृत्व चयन

नेपाल ज्योतिष परिषद् जिल्ला कार्य समिति सिन्धुपाल्चोकले दोस्रो बार्षिकोत्सव समारोह चौतारामा भव्यताका साथ सम्पन्न गरेको छ । परिषद्ले रिक्त रहेको केही पदमा पदपूर्ति गर्दै दोस्रो जिल्ला भेला सम्पन्न गरेको हो ।

परिषदको रिक्त रहेको अध्यक्ष पदमा उपाध्यक्ष नारायण त्त ढुंगानालाई बढुवा गरेको छ भने उपाध्यक्ष पदमा सदस्यबाट गोविन्द आचार्य र सहसचिव पदमा हरिगोपाल श्रेष्ठलाई नयाँ प्रवेश गराएको छ । अध्यक्ष र सहसचिव पदका क्रमशः गणेशप्रसाद पौडेल र हरिप्रसाद सापकोटा बागमती प्रदेश परिषदमा कोषाध्यक्ष र सदस्य पदमा मनोनीत भएपछि जिल्लाका पदहरु रिक्त थिए । परिषदको सदस्य पदमा सम्भुराज सुवेदीलाई मनोनीत गर्ने निर्णय गरेको जिल्ला सचिव सुर्य पौडेलले बताए ।

कार्यक्रममा बोल्दै प्रमुख अतिथि नेपाल ज्योतिष परिषद्का केन्द्रीय अध्यक्ष माधवराज पाण्डेले धर्मशास्त्रको निर्णय अनुसार गरिने यज्ञयागादी कर्महरु ज्योतिषशास्त्रले निर्णय गरेको समयमा गर्नुपर्ने
बताए । संस्थाहरू दर्ता धेरै हुने तर निरन्तरता भने कम मात्रै संस्थाले दिने गरेको देखिएकोमा ज्योतिष परिषदले भने स्थापना कालदेखि नै निरन्तररुपमा आफ्ना गतिविधिहरु संचालन गर्दै आएको उनले बताए ।

नेपाल ज्योतिष परिषद्का केन्द्रीय सदस्य शिवलाल पौडेलले ज्योतिष पुर्ण विज्ञान भएको बताउँदै व्यक्तिहरुलाई मार्गनिर्देश गर्ने शास्त्र रहेको बताए । उनले सिन्धुपाल्चोक जिल्लाको लागी सहयोग आवश्यक परेको खण्डमा जुनसुकै प्रकारको सहयोग गर्न तत्पर रहेको बताए । परिषदका बागमती प्रदेशका अध्यक्ष विष्णुप्रसाद तिमल्सिनाले मुहुर्तविना मंगल कार्य गर्न नहुने बताउँदै त्यस्तो कार्य गराउने ज्योतिषी पण्डितहरुको निगरानी हुनुपर्ने बताए । धर्म जागरण र ज्योतिषशास्त्रको संरक्षणका लागि ब्राह्मण पण्डितहरुको सक्रियता आवश्यक रहेको उनले बताए ।

कार्यक्रममा नेपाल ज्योतिष परिषद् वागमती परिषद्का महासचिव भिमप्रसाद पौडेल, प्रदेश सदस्यद्वय हरिप्रसाद पौडेल, हरिप्रसाद सापकोटा, पौडेल वंश महासंघ नेपाल सिन्धुपाल्चोक जिल्ला अध्यक्ष कृष्णप्रसाद पौडेल, समाजसेवी हरिगोपाल श्रेष्ठ , कमलचरण कक्षपती, साहित्यकार सम्भुप्रसाद सुवेदी ,नेपाल ज्योतिष परिषद् सिन्धुपाल्चोकमा जिल्ला उपाध्यक्ष जितबहादुर पोख्रेल लगायतले शुभकामना मन्तव्य राखेका थिए ।

कार्यक्रम नेपाल ज्योतिष परिषद् जिल्ला कार्य समिति सिन्धुपाल्चोकका अध्यक्ष गणेशप्रसाद पौडेलको अध्यक्षता, उपाध्यक्ष नारायणदत्त ढुंगानाको स्वागत मन्तव्य, सचिव सुर्य पौड्यालको सञ्चालनमा सम्पन्न भएको थियोे ।