नेपालमा कोरोना खोपको दोस्रो डोज अन्यौलमा

१२ चैत, काठमाण्डौ ।

नेपालमा पहिलो डोज कोरोना विरुद्धको खोप लगाएकाहरुको लागि दोस्रो डोज लगाउन पाउने वा नपाउने अन्यौल भएको छ । भारतले कोरोनाविरुद्धको कोभिसिल्ड खोपको निर्यातमा रोक लगाएपछि नेपालमा दोस्रो डोजको खोपको बारेमा अन्यौल भएको हो ।

भारतमा कोरोनाको सङ्क्रमीतको सँख्या बढ्दै गएपछि खोप आफ्नै देशमा चाहिने भन्दै खोप निर्यातमा रोक लगाएको छ । भारतको खोप निर्यात रोकेसँगै नेपालमा समेत असर पर्ने भएको छ । नेपालले भारतसँग खरिद गरेको २० लाख डोज खोपमध्ये अहिलेसम्म १० लाख डोज खोपमात्रै नेपाल आएको छ । बाँकी १० लाख डोज यही महिनाभित्र आउनुपर्नेमा भारतले खोप निर्यातमा रोक लगाएसँगै नेपालमा कोरोनाविरुद्धको दोस्रो खोप अभियान अनिश्चित बनेको हो । पहिलो डोज लगाएकालाई आउँदो वैशाख ७ गतेदेखि दोस्रो डोज दिने भनिए पनि अन्योल भएको छ ।

भारतले पठाउनु पर्ने बाँकी १० लाख डोज कहिलेसम्ममा आउँछ भन्नेमा अन्योल रहेको विज्ञले बताएका छन् । ‘खोप खरिद गरिसकेकाले नपठाउनुको विकल्प हुँदैन, कति समयपछि पठाउँछ भन्ने मात्र हो ’ स्वास्थ्य सेवा विभागको व्यवस्थापन महाशाखाका निर्देशक डाक्टर भीमसिंह टिंकरीले भने—“भारतीय खोप उत्पादक कम्पनीले खोपको पैसा लिइसकेकाले उसले खोप पठाउनै पर्छ ।”

नेपालमा सबैभन्दा पहिले गएको माघ ८ गते भारतबाट अनुदानमा १० लाख डोज खोप आएको थियो । यो खोप सरकारले माघ १४ गतेदेखि अग्रपङ्क्तिमा खटिएकाहरुलाई प्राथमिकतामा राखेर वितरण गरिएको थियो । यसपछि भारतसँग सरकारले २० लाख डोज खोप खरिद गरेको थियो । त्यसमध्ये १० लाख डोजमात्रै भित्रिएको छ । यस्तै कोभ्याक्स सुविधामार्फत नेपालले ३ लाख ४८ हजार डोज खोप पाएको थियो । नेपालमा अहिले सात लाख डोज खोप मौज्दातमा छ ।