काँग्रेसमा मोहन बस्नेतको उम्मेदवारी किन?

२५ मंसिर , काठमाडौं ।
नेपाली काँग्रेसको चालू महाधिवेशनमा खुल्ला तर्फबाट केन्द्रीय सदस्य पदको उम्मेदवार बनेका मोहनबहादुर बस्नेतले आफ्नो चुनावी घोषणापत्र सार्वजनिक गरेका छन् ।

शेरबहादुर देउवा प्यानलबाट केन्द्रीय सदस्यमा उम्मेदवारी दिएका बस्नेतले सामाजिक सञ्जाल मार्फत आफ्नो घोषणापत्र सार्वजनिक गरेका हुन् ।

यस्तो छ बस्नेतको घोषणापत्र :

आदरणीय महाधिवेशन प्रतिनिधि ज्युहरु, महासमिति सदस्य ज्युहरु, जिल्ला र क्षेत्रीय सभापति ज्युहरु लगायत लोकतन्त्र प्रेमी सम्पुर्ण काङ्ग्रेसी साथीहरु,

नेपाली काङ्ग्रेसको १४ औं महाधिवेशनमा मैले केन्द्रिय सदस्य (खुल्ला) तर्फबाट उम्मेद्बारी दिएको जानकारी गराउदै सदाका दिनहरुमा झैं तपाईंहरुको साथ, सहयोग र भरोसाको अपेक्षा राख्दछु ।

साथै, तपाईंहरुलाई मेरो उम्मेद्बारी किन भन्ने बारेमा केही कुरा जानकारी गराउदछु:

१) नेपाली काङ्ग्रेसको संगठन प्रणालीलाई चुस्त, दुरुस्त र चलायमान बनाई पार्टीलाई शसक्त रुपमा विपक्षी दलहरू संग भिड्नको लागि तयार बनाउने कार्यमा पहलकदमी लिन,

२) आसन्न प्रतिनिधि सभा, प्रदेश सभा र स्थानीय तहको निर्वाचनमा नेपाली काङ्ग्रेसलाई बहुमत सहितको पहिलो पार्टिको रुपमा स्थापित गर्ने आधारहरु निर्माण गर्ने कार्यमा सृजनात्मक ढंगबाट कदमहरु चाल्न,

३) गरिब, दु:खी, असाहय, घरबार विहिन, बाढी पहिरो भुकम्प आगलागी हुरीबतास जस्ता प्रकृतिक विपत्तिहरुमा “पहिला जनता बचाउँ, राजनीति पछि गरौंला” भन्ने भावका साथ आफैंले सदाका दिनहरूमा झैं निरन्तर कार्य गरी पार्टी पङ्तिलाई काम गर्नको लागि उत्साहित बनाउन र विपत्तको घडिमा देशका जुनसुकै स्थानमा छिटोछरितो सर्वसुलभ सेवा दिनको लागि पार्टीको नाममा हेलिकप्टर व्यवस्थापन गर्ने कार्यमा पहलकदमी लिन,

४) नेपाली काङ्ग्रेसका सम्पुर्ण तह र तप्काका नेताहरुलाई दिगो विकासका अवधारणा अबलम्बन गर्दै गाउँ, बेसी, शहरहरुमा विकासको लहर फैलाउने खालका गतिविधि संचालन गर्न उत्प्रेरित गराउन,

५) युवा तथा तरुण साथीहरु विदेश पलायन हुन पर्ने बाध्यात्मक परिस्थितिलाई क्रमशः न्यूनीकरण गर्ने परिस्थिति निर्माण गर्दै देशमा केही काम गर्न सक्ने वातावरण निर्माण गर्न पार्टी पङ्ती संग सहकार्य गर्ने र युवा लक्षित खेलकुदका गतिविधिहरुमा व्यापक रुपमा लाग्न उत्प्रेरित गर्ने खालका कार्य गर्न पार्टी पङ्तिलाई अग्रसर गराउने कार्यमा पहलकदमी लिन,

५) पार्टीका स्रोत साधनहरुलाई उचित परिचालन गर्ने खालका कार्य योजना बनाई उक्त कार्य योजनाहरुलाई प्रभावकारी ढंगबाट कार्यन्वयन गराउने कार्यमा पहलकदमी लिन,

६) देशमा शिक्षा, स्वास्थ्य, रोजगारी, भौतिक पुर्वाधार, खानेपानि लगायत विभिन्न खालका विकासका पुर्वाधारहरु पर्याप्त रुपमा उपलब्ध गराई नागरिकहरुको मुहारमा खुसीको प्रत्याभूति गराउने कार्य गर्न पार्टी पङ्तिलाई अग्रसर गराउन,

७) देशको अर्थ व्यवस्थालाई मजबुत बनाउने र रोजगारी दिने खालका सबै व्यवसायीहरुलाई सम्मानित गर्दै नेपाल राष्ट्र निर्माण गर्ने कार्यमा अग्रसर गराउन पार्टी पङ्ती संग समन्वय गरि उचित कदम चाल्न,

८) समयसापेक्ष स्वदेश तथा विदेशमा रहनु भएका नेपाली दिदिबहिनी दाजुभाईहरुको समस्यामा आधारित भई संगठनात्मक र रचनात्मक ढंगबाट कार्य उन्मुख भई जस्तोसुकै क्षणमा पनि पार्टीको साख जोगाउने खालका कार्य गर्न

अन्तमा: माथी उल्लेखित कार्यको लागि मात्र नभई पुर्व मेची देखि पश्चिम महाकाली सम्म तपाईंहरुको हरेक सुख दु:ख मा मेरो सदैव साथ रहने प्रतिबद्धता जाहेर गर्दछु ।

जय नेपाल!