क्यान्सरको उपचार गर्न आफ्नै कविता संग्रह विक्री गर्दै न्यौपाने

‘क्यान्सरसँगको लडाइँ म शब्दले, कलम हतियार बनाई लडिरहेछु,
एक्लै असम्भव छ यो युद्ध रणभूमिमा, म सहयोगी मित्र खोजिरहेछु’

बोनम्यारोमा क्यान्सर भई अस्पतालको बेडमा सुतेर लेखिएका यी कवितांश हुन् कवि नवराज न्यौपानेका । न्यौपाने लामो समयदेखि क्यान्सरसँग जुध्दै आएका छन् । अस्पतालको बेडमै बसेर लेखिएका कविताहरु संग्रह गरी उनले ‘सपनाका लहरहरू भाग ३’ विमोचन समेत गरेका छन् । आफ्नो उपचारमा आर्थिक अभाव भएपछि सो अभाव टार्न उनले कविता संग्रह बेच्ने निधो गरेका हुन् ।

जेठ १९ गते शनिवार काठमाण्डौंको शान ब्याङ्केटमा सो पुस्तक विमोचना गरिएको  हो । र्कायक्रमका प्रमुख अतिथि वाग्मती प्रदेशका उद्योग, पर्यटन, वन तथा वातावरण पूर्व मन्त्री अरुण नेपालले क्यान्सर तथा यस्तै ठूला रोग लागेका नागरिकहरुका लागी सरकारलेनै विशेष योजना ल्याउनु पर्ने बताए।

बिशेष अतिथिका रुपमा बोल्दै सुनकोशी गाँउपालिकाका अध्यक्ष टपिन्द्र प्रसाद तिमल्सीनाले भने, ‘कवि नवराजलाइ स्थानिय निकायले गर्न सक्ने सहयोग र सहजकिरणका लागी हामी सधैं साथमा रहने छौं ।’ यसै गरी लेखक तथा पत्रकार दामोदर न्यौपानेले साहित्य मार्फत सामाजिक योगदान गरेका कविलाइ सबैले सहयोग गर्नु पर्ने बताए । उनले यस अघि पनि धेरै क्यान्सर पिडितहरुका लागी सहजिकरण गरेको र क्यान्सर रोग लाग्दैमा सबैले माया मार्ने प्रबृतिलाइ बदल्दै उनीहरुको मनोबल बढाउन अनुरोध गरे ।

साहित्य लेखनमा जिवन बिताएका अग्रज साहित्यकार चन्द्र प्रसाद न्यौपानेले कवि नवराजको मनोबल उच्च भएकाले उनको जीवन रक्षाका लागी सबैले सहयोग गर्नु पर्ने बताए ।

पत्रकार तथा लेखक बिमल नेपालले सहजकिरण गरेको कार्यक्रमको शुरुवातमा पत्रकार तथा कवि नवराज न्यौपानेका काका हरि कृष्ण न्यौपानेले उनका कविता संग्रहहरु ‘सपनाका लहरहरु भाग १,२ र ३ का बारे प्रष्ट पारेका थिए ।

उनले कुवेतमा काम गर्दा गर्दै बोनम्यारो (रक्त) क्यान्सर भएका कविको अहिलेको स्थिति बारे जानकारी दिदै विदेशबाट फर्किएका बिरामीहरुलाइ समेत सरकार तथा समाजले बिभेद गरेको र यस्ता दृष्टिकोण परविर्तन हुनु पर्ने बताए । कार्यक्रममा क्यान्सर फाइटर कवि नवराजले आफ्ना कविता तथा गीत लेखनका अनुभव अनि जीवनमा भोगेका दुख–सुखका कुरालाइ सुनाएका थिए ।

उनले आफ्ना दुइ कविताहरु सुनाउदै सबैलाइ भावुक बनाएका थिए । उनले कुवेतबाट डक्टरले ८ महिना मात्र बाँच्छ भनेर पठाए पनि आफ्नो मनोबल कडा भएकाले २ वर्ष सम्म केही नभएको र आफ्नो उपचारमा सहयोग गर्ने अनुस्प्रध ब्याण्ड तथा सबै सहयोगीहरूलाइ जीवनभर नबिर्सने बताए ।

उनले सबैको साथ, सहयोग र माया रहेमा अझै बाँच्ने र आफ्नो कविता संग्रह खरिद गरी उपचरमा सहयोग गर्न अनुरोध गरे । उनले आफु अर्को कृतिको तयारीमा लागी सकेको र क्यान्सरले नै आफुलाइ कवि बनाएको  बताए ।

पुस्तक ख़रीद तथा सहयोगका लागी कवि नवराज न्यौपानेलाई ९८६०४६८२७४ गर्न सक्नु हुनेछ ।