दिसा गर्दा निस्क्यो १ किलो सुन

तस्करहरुले गिरोहको विभिन्न तरिका अपनाएर गैरकानुरी रुपमा आयात निर्यात गर्दै आएको कुरा त सुनिदैं आएको हो । यसै क्रममा त्रिभुवन विमानस्थलबाट पक्राउ परेका एक व्यक्तिलाई दिसा गराउँदा झन्डै एक किलो सुन निस्किएको छ ।

हिजो बिहान फ्लाइ दुबईको उडानद्वारा दुबईबाट काठमाण्डौ आएका भारतीय नागरिक राहुल रेमानानलाई प्रहरीले विमानस्थलबाटै पक्राउ गरेको थियो ।

प्रहरीलाई शङ्का लागेर पक्राउ गरी काठमाण्डौ मेडिकल कलेजमा एक्स–रे गराउँदा पेटभित्र शङ्कास्पद वस्तु देखिएपछि प्रहरी वृत्त गौशालामा दिसा गराएको थियो । दिसा गर्ने क्रममा अर्धठोस अवस्थामा बेलनाकार चार वटा पोका फेला पारेको र त्यो झन्डै एक किलो रहेको र यस सम्बन्धमा थप अनुसन्धान भइरहेको प्रहरीले जनाएको छ ।

गत २८ चैतमा मलद्वारमा लुकाएर सुन तस्करी गर्न खोज्ने तीनजना चिनियाँ पक्राउ परेका थिए । भन्सारमा मेटल डिटेक्टरमार्फत चेकिङ गर्दा शरीरभित्र मेटल देखिएको थियो । अस्पतालमा लगेर एक्सरे गराउँदा सुन भएको खुल्यो । उनीहरूलाई दिसा गराएर प्रहरीले सुन निकालेको थियो । उनीहरू चाइना इस्टर्नको विमानमार्फत चीनको कुन्मिङबाट नेपाल आएका थिए ।