डडुवामा काठ तस्कर गर्ने ११ जना पक्राउ

सिन्धुपाल्चोकको चौतारा साँगाचोकगढी नगरपालिका १४, डडुवाको झ्याडी खोला नजिकै काठ तस्कर गरिरहेको अवस्थामा ११ जना पक्राउ परेका छन् ।

स्थानियको सुराकीको आधारमा डिभिजन वन कार्यालय चौतारा र प्रहरी चौकी साँगाचोकको संयुक्त टोलिले हिजो राति करिब २ बजे टिपर सहित काठ र दाउरा बरामद गरेको जिल्ला प्रहरी कार्यालय, सिन्धुपाल्चोकका प्रहरी नायव उपरीक्षक शिव बुढाथोकीले बताए ।

खोले खोके सामुदायिक वन क्षेत्र बाट साल प्रजातिको १४ गोलिया करिब १९ क्युफिट काठ र एक टिपर दाउरा बरामद गरिएको हो । बा ३ ख ९५०७ नम्बरको टिपरमा लोड गरेर अन्यत्र लैजादै गरेको अवस्थामा उक्त अबैध काठ दाउरा बरामद गरि डिभिजन वन कार्यालयमा राखिएको छ भने पक्राउ परेका ११ जनालाई प्रहरी हिरासतमा राखिएको छ ।