परिक्षा स्थगित भएपछि शिक्षक र विद्यार्थी आक्रोशित

विजय नेपाल
१५ वैशाख, चौतारा ।

वैशाख महिनाभरी सम्पुर्ण परिक्षा सकेर जेठबाट विद्यालय बन्द गर्ने निर्णय तीन दिन पनि नटिक्दा शिक्षक तथा विद्यार्थी आक्रोसित भएका छन् । १३ गते जिल्ला कोभिड १९ संकट व्यवस्थापन समितिको वैठकले परिक्षा गर्ने निर्णय गरेको थियो भने त्यसको तीन दिन नवित्दै सोहि समितिले १५ गते विद्यालय बन्द गर्ने निर्णय गरेको हो ।

संघिय सँसदका सभामुख अग्निप्रसाद सापकोटासहित १३ गते बसेको समितिको वैठकले सिन्धुपाल्चोकमा वैशाख महिनाभरीमा माध्यामिक शिक्षा परिक्षा (एसईई) को तयारी परिक्षा सहित विद्यालय तहको सम्पुर्ण परिक्षा सम्पन्न गर्ने निर्णय गरेको थियो । सो वैठकले परिक्षा सम्पन्न गरेर जेठबाट भने जिल्लाभरीका सम्पुर्ण विद्यालय बन्द गर्ने निर्णय गरेको थियो । त्यसै निर्णय अनुसार जनस्वास्थ्य मापदण्ड पालना गर्दै वैशाख १६ गतेबाट शनिवार समेत परिक्षा गर्नेगरि परिक्षा तालिका सार्वजनिक भएको थियो ।

प्रकाशित परिक्षा तालिका बमोजिम विद्यालय, शिक्षक तथा विद्यार्थीहरुले परिक्षाको तयारी गरिरहँदा १५ गते बुधबार सबै तहको परिक्षा स्थगन गर्ने निर्णय गरिएको हो । यसरी सबै तयारी भइसकेपछि परिक्षा स्थगिथ गर्दा आफुहरु मर्कामा परेका भन्दै शिक्षक तथा विद्यार्थी आक्रोशित भएका हुन् । कि त पहिले नै परिक्षा नगर्ने निर्णय गर्नुपथ्र्यो कि त तोकिएको परिक्षा सम्पन्न गर्नपथ्र्यो भन्दै उनीहरु आक्रोशित भएका हुन् ।

जतिखेर जे मन लाग्यो त्यही निर्णय गरेको भन्दै चौतारा साँगाचोकगढी नगरपालिका—८ स्थित इर्खु माध्यामिक विद्यालयका शिक्षक प्रकाश दंगालले सामाजिक सञ्जालमा आक्रोश पोखेका छन् । सोही निर्णय दुइ दिन अघि नै गरेको भए शिक्षक तथा विद्यार्थीलाई सहज हुने उनले बताए । विद्यालयले प्रश्नपत्र निमार्ण तथा छपाइ सहित अन्य सम्पुर्ण तयारी गरिसकेपछि परिक्षा स्थगित गर्दा आफुहरु समस्यामा परेको उनले बताए । ‘विद्यालयले गरेको तयारीको क्षतीपुर्ती कस्ले व्यहोर्छ ?’ दंगालले भने ।

आफुहरुले परिक्षाको लागि तयारी गरिरहँदा एक्कासी स्थगित हुँदा आफुहरुमा निराशा छाएको चौतारा साँगाचोकगढी नगरपालिका —२ स्थित कालिकादेवी माध्यामिक विद्यालयको कक्षा १० मा अध्ययनरत छात्रा ललिता गजमेरले बताइन् । परिक्षाको तयारी गरिरहेको अन्तीम समयमा यसरी स्थगित हुँदा आफुहरुको तयारी खेर गएको उनले गुनासो गरिन् । आफुहरुको परिक्षा पनि अघिल्लो वर्ष जस्तै हुने हो की भन्ने चिन्तामा समेत उनी छिन् ।

परिक्षा तोकेर अन्तीम समयमा यसरी स्थगित गरिँदा विद्यार्थीहरुको परिक्षा प्रतिको मानसिकता नै नकारात्मक हुन जान्छ । सम्बन्धित निकाएले हतारमा निर्णय गर्नुभन्दा स्वास्थ्य सुरक्षाको अवस्था हेरेर मात्रै दिर्घकालिन निर्णय गर्नु आवश्यकता देखिन्छ ।