इर्खु माविले मनायो वार्षिकोत्सव

सिन्धुपाल्चोकको चौतारा साँगाचोकगढी नगरपालिका ८ स्थित इर्खु माध्यामिक विद्यालयले ६४ औं वार्षिकोत्सव मनाएको छ । विद्यालयका उत्कृष्ट शिक्षक तथा विद्यार्थीलाई सम्मान गर्दै विद्यालयले भव्य समारोहका बिच वार्षिकोत्सव मनाएको हो ।

विद्यालयमा रहेर शैक्षिक गुणस्तर सुधारका लागि उत्कृष्ट कार्य गरेबापत प्रोत्साहन गरेबापत विद्यालयका प्राथमिक तह शिक्षक चक्रबहादुर खडायतलाई प्रशंसा पत्रद्वारा सम्मान गरिएको विद्यालयका प्रधानाध्यापक प्रकाश दङ्गालले बताए । त्यस्तै विद्यालयका उत्कृष्ट विद्यार्थीको रुपमा सुजन तामाङ र पाल्मो तामाङ समेत सम्मानित भएका छन् । सोही अवसरमा विद्यालयका संरक्षकहरु यमबहादुर ठकुरी, बिलबहादुर श्रेष्ठ (मरणोपरान्त), रामबहादुर तामाङ र धनबहादुर श्रेष्ठ समेत सम्मानित भए ।

विद्यालयको शैक्षिक तथा भौतिक विकासमा महत्वपूर्ण सहयोग गरेबापत चौतारा साँगाचोकगढी नगरपालिकामा नगरप्रमुख कृष्णप्रसाद सापकोटा र नगरका सामाजिक विकास समिति संयोजक रामप्रसाद गौतमलाई समेत सम्मान गरेको छ । त्यस्तै लोकप्रिय नेत्रज्योती सञ्चार समुहका नेत्रबहादुर बस्नेत समेत सम्मानित भएका छन् ।

कार्यक्रम विद्यालय व्यवस्थापन समितिका अध्यक्ष भगवान खड्काको अध्यक्षता, स्वास्थ्य तथा जनसंख्या मन्त्रि मोहनबहादुर बस्नेतको प्रमुख आतिथ्यता, चौतारा साँगाचोकगढी नगरपालिकाका नगर प्रमुख कृष्णप्रसाद सापकोटाको विशेष आतिथ्यमामा सम्पन्न भएको हो । वार्षिकोत्सव कार्यक्रममा विद्यालयका प्रधानाध्यापक दङ्गालले विद्यालयका प्रगति तथा आर्थिक प्रतिवेदन पेश गरेका थिए ।