भोलीबाट गाँउगाँउमा कोरोनाविरुद्धको खोप लगाइने

२४ जेठ, चौतारा ।

भोलीबाट सिन्धुपाल्चोकको सबै स्वास्थ्य संस्थाबाट कोरोना विरुद्धको खोप लगाइने भएको छ । ६२ वर्षदेखि ६४ वर्ष उमेर समुहका व्यक्तिका लागि खोप लगाउन लागेको हो ।

चिन सरकारबाट अनुदान प्राप्त भेरोसिल खोप सो उमेर समुहका व्यक्तिलाई खोप लगाउन लागिएको स्वास्थ्य कार्यालय, चौताराका वरिष्ठ जनस्वास्थ्य अधिकृत दुर्गादत्त चापागाँईले बताए । चापागाँईका अनुसार जिल्लाका साविकका ७९ वटा गाविसमा रहेका स्वास्थ्य संस्था सहित ८० वटा केन्द्रबाट खोप लगाउन सकिनेछ । ४ हजार १ सय ६ जनालाई खोप लगाउने लक्ष्य सहित दुइ दिनसम्म खोप कार्यक्रम सञ्चालन हुनेछ । एक महिनापछि लगाउने गरी यस खोपको दोस्रो डोज समेत मौज्जाद राखी खोप लगाउन लागिएको चापागाँईले बताए ।

कोरोना संक्रमण भइ निको भएका एक महिना पुरा नभइ यो खोप लगाउन नहुने चापागाँईले बताए । कोरोना संक्रमण भइ प्लाज्मा थेरापीबाट उपचार गराएका विरामीले समेत निको भएको ९० दिन पुरा नभइ खोप लगाउन मिल्दैन । दिर्घ रोग भएकाहरुले खोप लगाउन मिल्ने भएपनि हाल सिकीस्त विरामी भएका र पहिले कुनै पनि खोप लगाउदा एलर्जि भएकाहरुलाई यो खोप नलगाउन समेत चापागाँईले सुझाव दिएका छन् ।

खोप लगाउनका लागि आफ्नो उमेर खुल्ने सरकारी परिचयपत्र लिएर स्वास्थ्य केन्द्रमा जानुपर्नेछ । यसको लागि परिवारका अन्य सदस्यले पनि सहयोग गरीदिन चापागाँईले अनुरोध गरे । त्यसैगरी अहिले तोकीएको उमेर समुह बाहेक अरुले खोपको लागि दवाव नदिन र अरु समुहको लागि नेपाल सरकारले क्रमशः खोप लगाउने हुनाले अहिले तोकिएको उमेर समुह बाहेक अरुलाई खोप लगाइने छैन ।

जिल्लामा यस अघि नै ६५ वर्ष भन्दा माथीका नागरीकका लागि कोभिसिल्ड खोपको पहिलो डोज लगाइसकिएको छ । जिल्लामा सो खोप लगाएका १२ हजार ७ सय भन्दा बढी जनसंख्याको लागि दोस्रो डोज लगाउनको लागि पनि तयारी भइरहेको छ । कोभिसिल्ड खोपको पहिलो डोज लगाएकाहरुले यो भेरोसिल खोप लगाउन भने मिल्दैन ।