चौतारा अस्पताल १५ शैया समुहमा देशकै उत्कृष्ट

सिन्धुपाल्चोकको सदरमुकाम चौतारामा रहेको चौतारा अस्पताल १५ शैया समुहमा देशकै उत्कृष्ट अस्पताल बनेको छ । बागमती प्रदेश सरकार स्वास्थ्य मन्त्रालय स्वास्थ्य निर्देशनालयबाट २०७९ चैत्र ८ र ९ गते भएको न्यूनतम सेवा मापदण्ड अनुगमनमा चौतारा अस्पताल सिन्धुपाल्चोकले  ८९% प्राप्त गरी नेपालकै १५ बेड अस्पताल समूह अन्तर्गत प्रथम भएको हो ।

निर्देशनालयका निर्देशक महेश्वर श्रेष्ठ तथा न्यूनतम सेवा मापदण्ड अनुगमन टोली प्रमुख बरिष्ठ जनस्वास्थ्य प्रशासक डा. नरेन्द्र कुमार झा सहितको ५ सदस्यीय टोलीले  अनुगमन गर्दा अस्पतालको सेवामा जम्मा ६ सय ४७ वटा मापदण्ड मध्ये ५ सय ७६ मापदण्डहरूको कुल ७ सय ६१ नम्बर बाट ६ सय ७८ नम्बर  प्राप्त गरी नेपालभरि मै उत्कृष्ट नम्बर ल्याउन सफल भएको संयोजक झाले बताए । मूल्याङ्कनको क्रममा अस्पतालहरूको लेखा, प्रशासन, अस्पताल भित्र चल्ने क्लिनिकल सर्भिस, सपोर्ट सर्भिस, व्यवस्थापन पक्ष, लगायत सबै प्रकारको अवस्था हेरेर मूल्याङ्कन गरिएको थियो । न्यूनतम सेवा मापदण्डमा सुशासनमा २० प्रतिशत  क्लिनिकल सेवा  प्रवाहमा ६० प्रतिशत र अस्पताल सपोर्ट सर्भिसमा २० प्रतिशत गरी कुल जम्मा १०० प्रतिशत मध्ये ८९ प्रतिशत ल्याइ नेपालमै १५ शैय्या क्याटेगोरीमा प्रथम भएको संयोजक झाले समीक्षा कार्यक्रममा बताए ।

न्यूनतम सेवा मापदण्ड समीक्षा कार्यक्रममा प्रमुख अतिथी चौतारा साँगाचोकगढी नगरपालिकाका नगरप्रमुख कृष्णप्रसाद सापकोटाले आफ्नो नगरभित्र रहेको अस्पतालले सीमित श्रोत साधनको बावजुत पनि गरेको प्रगतिले अस्पतालको मात्र नभइ नगरको र जिल्लाको समेत नाम राख्न सफल भएकोमा खुसी व्यक्त गरे । यो नतिजाले अस्पतालले स्वास्थ्य क्षेत्रमा धेरै सुधार भएको प्रमाण दिएको भन्दै अब बाँकि रहेको ११ प्रतिशत काम पनि पुरा हुनेमा सापकोटाले विश्वास व्यक्त गरे ।

विशेष अतिथिमा रहनुभएका चौतारा साँगाचोकगढी नगरपालिकाको उपप्रमुख सिता थापाले अस्पताललाई आफुले नजिक बाट हेरिरहेको बताउँदै अस्पतालको विकास निर्माण तथा सेवा बिस्तारमा हातेमालो गर्ने प्रतिबद्धता व्यक्त गरिन् भने निर्देशनालयका निर्देशक महेश्वर श्रेष्ठले अस्पतालको गतिलाई थप प्रभावकारी ढंगबाट सञ्चालन गरी तत्काल ५० शैय्यामा स्तरोन्नतिका साथ देशको उत्कृष्ट अस्पतालको रुपमा चिनाउन तिनै तहका सरकारले सहयोग गर्नुपर्ने बताए ।

अस्पताल सञ्चालन तथा व्यवस्थापन समितिका अध्यक्ष टंकबहादुर कार्कीले विज्ञमार्फत दिएको निर्देशन तथा सुझाव अस्पतालको नियमित सेवासँग सम्बन्धित भएकाले त्यसको पनि सुधार गरेर अर्को वर्ष शतप्रतिशत हासिल गर्ने लक्ष्य लिइ अगाडि बढ्ने प्रतिबद्धता जनाए भने अस्पताललाई यो अवस्थामा ल्याउन अस्पतालमा कार्यरत कार्यालय सहयोगी देखि सम्पूर्ण स्वास्थ्यकर्मी कर्मचारीहरूको ठुलो भूमिका रहेको भन्दै अस्पतालका मेडिकल सुपरिटेन्डेन्ट डा. त्रिभुवनचन्द्र झाले सहयोगी सबैलाई धन्यवाद दिए । अनुगमन पछि फलोअप समिक्षामा बिभिन्न सुचाङ्कको आधारमा अनुगमन गरिएको र १०० अङ्क ल्याउन ११ अङ्क नपुग्नुका कारणहरू बारेमा समेत समीक्षा गरिएको थियो ।

कार्यक्रममा अस्पतालबाट महिनामा उत्कृष्ट हुने कर्मचारीहरुलाइ सम्मान समेत गरीएको थियो । मंसिर महिनाका उत्कृष्ट कर्मचारी कार्यालय सहयोगी तामबहादुर श्रेष्ठ, पौष महिनाका सहायक कम्प्युटर अपरेटर विवेक श्रेष्ठ,  माघ महिनाका मेडिकल अधिकृत डा. सुसान्त श्रेष्ठ, फागुन महिनाका स्टाफ नर्स रन्जिता श्रेष्ठ र कार्यालय सहयोगी टिकालाल श्रेष्ठ रहेका थिए भने अस्पतालमा आएका विरामीहरुको विद्युतीय अभिलेख चुस्त दुरुस्त राख्ने ३ शाखाहरु अन्तरंग विभाग, बहिरंग विभाग र प्रयोगशाला शाखालाई समेत सम्मान गरेको थियो ।