मोटर गुडाउन मासियो पुरानो बजारको मौलिकता

३० जेठ, चौतारा ।

मालबाहक सवारीसाधान चलाउन नपाएपछि चौतारा पुरानो बजारको मौलिकता नै मासिने गरी पुर्वाधार निर्माण गर्न थालिएको छ । ढुङ्गा छापिएको सडकमा स्थानिय व्यापारी सामान तथा निर्माण सामग्री बोकेको मालबाहक गाडी चलाउन नमिलेपछि मौलिकता नै मासेर सडकको ढुङ्गा हटाएर ढलान गर्न थालिएको हो ।

सिन्धुपाल्चोकको चौतारा साँगाचोकगढी नगरपालिका वडा नं. ५ स्थित चौताराको पुरानो बजारमा छापिएको स्लेट ढुङ्गा हटाएर ढलान गर्न लागिएको हो । भुकम्पपछिको पुनर्निर्माणको अन्तिम चरणमा पुग्दै सो बजारमा भने निर्माण सामग्री बोक्न भन्दै मौलिकता मास्न थालिएको हो । बागमती प्रदेश सरकारको ५० लाख आर्थिक सहयोगमा सो सडकको मौलिकता मास्न थालिएको छ । चौताराको पुरानो बजारस्थित भिमसेनथानदेखि छापको गर्चेखोलासम्म ढलान गर्नको लागि प्रदेश सरकारसँग रकम माग गरिएकोमा भिमसेनथानदेखि नारायणथान नजिकैसम्म ढलान गर्नको लागि छापिएको ढुङ्गा निकाल्न थालिएको हो ।

अहिले पुरानो बजारको दोचाखोलादेखि कृष्ण मन्दिरसम्मको ढुङ्गा निकाल्न थालिएको छ । वि.सं. २०६६÷६७ सालमा पुरानो ढुङ्गा झिकेर नयाँ ढुङ्गा छापिएको सो बजारमा केही ढुङगा केही विग्रीएका थिए । कम लगानीमै विग्रिएका ढुङ्गा मर्मत गर्न सकिनेमा मौलिकता नै मासेर सबै ढुङ्गा हटाउन थालिएको हो । ‘दोचाखोलाबाट मालबाहक सवारी साधन छिर्न नपाँउदा स्थानियहरुलाई समस्या भइरहेको थियो ।’ चौतारा साँगाचोकगढी ५ का वडाध्यक्ष नरमान श्रेष्ठले भने —‘सवारीसाधन चलाँउदा केही ढुङ्गा फुट्न थालेको र ढल व्यवस्थापनका लागि मंगल ढाक्न प्रयोग गरिएको फलामे डण्डीको जाली समेत लच्किएपछि त्यसलाई हटाउन लागिएको हो ।’

यही असार मसान्तसम्म काम सम्पन्न गर्नेगरी ठेक्का प्रकृयाबाट काम शुरु भइसकेको छ । यसरी सिमीत व्यक्तिको फाइदाको लागि बजारको मौलिकता मास्न नहुने स्थानियहरु बताउनछन् । ‘चौताराको पुरानो बजार छुट्टै ऐतिहाँसिक मौलिकता बोकेको बजार हो ।’ जिल्ला रेडक्रस सोसाइटीका मन्त्री एवं स्थानिय कमलचरण कक्षपतिले यस कार्यलाई बजेटको अनावश्यक खर्चको संज्ञा दिदैं ‘हुनेखानेको विकास’ भनेका छन् । केहि सिमित व्यक्तिको स्वार्थको लागि गरिएको यस कार्यलाई स्थानिय हेमन प्रधानले वाहीयात र निकृष्ट कार्य भएको बताए । भइरहेको मौलिक संरचना मास्ने सोचाइ राख्नु नै गलत भएको उनले बताए ।

सो सडकबाट निकालिएको ढुङ्गा स्थानिय मठमन्दिरहरुको प्राङ्गणमा छाप्ने वडा कार्यालयको योजना छ । केही ढुङगा स्थानिय मन्दिरहरुमा पु¥याइएको भइपनि केही भने ठेकेदारले अन्यत्रै लगेको शंका लागेपछि अहिले सो ढुङ्गा निकाल्ने काम समेत रोकिएको एक स्थानियले बताए । सो ढुङ्गा निकालेर नजिकै जम्मा गर्ने गरी ठेक्का लागेको भएपनि ठेकेदारले सो ढुङ्गा आफ्नो हुने भन्दै अन्यत्र लगेको स्थानियको आरोप छ ।

विकासको नाममा भइरहेको मौलिक सम्पदा मास्नु गलत कार्य हो । केही व्यापारी तथा ठेकेदारको स्वार्थको लागि मौलिक सम्पदा मास्दा पछिल्लो पुस्ताको लागि अन्याय हुन जान्छ ।