कुविण्डे एमाले अधिवेशनः यस्तो छ तथ्य र प्रमाणहरु

बुद्ध घले, ६ कात्तिक, चौतारा ।

देशभर नेकपा एमालेको वडा अधिवेशन चलिरँहदा सिन्धुपाल्चोकको चौतारा साँगाचोकगढी नगरपालिका ४ कोअधिवेशन भने विशेष चर्चामा रह्यो ।

सो वडाको वडाध्यक्षमा रुद्रप्रसाद सापकोटा निर्विरोध निर्वाचित भए ।

रुद्रप्रसाद सापकाेटा

सभामुख अग्नी प्रसाद सापकोटाको गाँउमा सापकोटा नै एमाले वडाध्यक्ष हुँदा माओवादीभित्र एकखाले तरँग उत्पन्न भएको थियो ।

सापकोटा अध्यक्ष भएको समाचार सेलाउन नपाउँदै उनैले आफु नेकपा (माओवादी केन्द्र) मा रहेको र आफुलाई जवरजस्ती एमालेको वडाध्यक्ष बनाएको विज्ञप्ती जारी गरे । उनले माओवादी केन्द्रको सदस्यता नविकरणको लागि असोज १० गते नै भरेको फारम समेत सार्वजनिक गरेका छन् । तर सो फारम नै शंकास्पद रहेको छ ।

सापकाेटाकाे विज्ञप्ती

सो फारम हतारमा भरिएजस्तो सामान्य विवरण मात्रै भरिएका छन् । सो फारममा सामान्य विवरण जस्तै जन्ममिति, मतदाता परिचयपत्र नं., पुर्ण सदस्यता प्राप्त मिति, जाती, पेशा समेत उल्लेख गरिएको छैन भने नविकरण सिफारीस र स्विकृत गर्नेको नाम र हस्ताक्षर समेत खाली छ । सदस्यता नविकरण फारम र विज्ञप्तीमा उनकै हस्ताक्षर समेत फरक छ ।

सापकाेटाकाे सदस्यता नविकरण फारम

सापकोटा एमालेको वडा अध्यक्ष भइसकेपछि माओवादीको दवावका कारण पछाडी हटेको हुनसक्छ । ‘उहाँ आफैं अधिवेशनमा सहभागी भएर अध्यक्ष पदमा निर्वाचित गरिएको माइन्युटमा हस्ताक्षर समेत गर्नुभएको छ ।’ वडा निर्वाचन समितीका संयोजक डम्बरबहादुर श्रेष्ठले भने —‘त्यो माइन्युट र उहाँ सहभागी भएको तस्बिर र भिडीयो समेत हामीसँग सुरक्षीत छ ।’

निर्वाचन समितिले उपलब्ध गराएको माइन्युटमा उनको हस्ताक्षर प्रष्ट देखिन्छ भने फोटो तथा भिडीयोमा समेत उनी कुनै जवर्जस्तीले नभइ आफ्नै राजीखुसीले भेलामा आएको आभाष हुन्छ ।

सापकाेटाकाे हस्ताक्षर भएकाे माइन्युट

माओवादी केन्द्रको पकड क्षेत्र मानिने सिन्धुपाल्चोकको चौतारा साँगाचोकगढी नगरपालिका वडा नं ४ कुविण्डेमा नेकपा एमालेको अधिवेशनबाट वडाध्यक्षमा रुद्रप्रसाद सापकोटालाई जिम्मेवारी सुम्पेको थियो ।

कुविण्डेको अधिवेशनलाई सम्बोधन गर्न पुगेका बागमती प्रदेशका पूर्व मन्त्री एवम् प्रदेश सभा सदस्य सरेश नेपालले कुविण्डेबाट सभामुख, केन्द्रीय सदस्य र मेयर समेतले प्रतिनिधित्व गरेता पनि विकास भने कछुवाकै गतिमा रहेको आरोप लगाएका थिए ।