थुम्पाखर दुर्घटनाका घाईते रोहीत क्षेत्री भन्छन्— ड्राइभर आत्तिनाले दुर्घटना भयो

खाडीचौर, २० माघ ।

दुर्घटनाका घाइते रोहीत क्षेत्रीको भनाइ उहाँकै शब्दमा—

म लादुकबाट काठमाण्डौ जानको लागि सो बस चढेको थिँए । लादुकबाट कच्चि सडकमा गाडी गुड्दा नै मलाई उसको गाडी चलाई त्यती ठिक लागेको थिएन । म बजार आइपुगेर सो गाडी छाडेर अर्कै गाडीमा चढेर काठमाण्डौ जाने विचार गरिसकेको थिंए । तर बसका साहु मेरो चिनजानको मान्छे भएकोले मलाई गाडी नफेर्न आग्रह गर्नुभयो । उहाँले बरु ड्राइभरलाई कम गतीमा गाडी चलाउन निर्देशन दिनुभयो । त्यती गर्दा पनि गाडीको गती कम भएन । म गाडीको क्याविन सिटमा नै बसेको थिँए ।

११ किलो भन्ने स्थानमा आइपुग्दा गाडीको गती झनै वढ्यो । यत्तिकैमा अगाडी बाटोमा एउटा टिपर साइड लगाएर रोकेर राखेको रहेछ । जसकारण हाम्रो गाडी अर्को साइडबाट अगाडी बढ्न खोज्यो । त्यसबेलासम्म पनि गाडीको गती घटेको थिएन । जब हाम्रो गाडी सडकको अर्कोपट्टि पुग्यो, ठिक त्यही बेला विपरित दिशाबाट अर्को टिपर पनि हामीतिरै आँउदै गरेको देखियो ।

त्यतिबेला हामी चढेको गाडीको ड्राइभर आत्तिय जस्तो देखियो । उनले गाडी रोक्ने प्रयास गरेको भए यो दुर्घटना नहुन पनि सक्थ्यो । तर उनले गाडी नरोकी आफ्नै साइडमा लाने प्रयास गरे । गाडी तिब्र गतीमा भएको कारण उनको प्रयास सफल हुन सकेन र गाडी रुखमा ठोक्किन पुग्यो र गाडी पल्टिन पुग्यो । ड्राइभरले गाडी रोक्ने प्रयास गरेको भए सायद गाडी नियन्त्रणमा आएर रोकीन पनि सक्थ्यो तर उसले गाडी उसै छाडीदिँदा यो दुर्घटना हुन पुग्यो ।

दुर्घटनामा मेरो निधार, आँखा र हातमा चोट लागेको छ । जिउ पनि दुखीरहेको छ । म अहिले सिन्धु सदावहार अस्पतालमा उपचार गराइरहेको छु । (विजय नेपालले गरेको कुराकानीमा आधारीत)