सडक भासिएपछि मेलम्ची जाने सडक अवरुद्ध

२२ साउन, मेलम्ची ।

मेलम्ची खोलाको निरन्तर कटानपछि सडक भासिंदा काठमाडौंबाट जिरोकिलो हुँदै मेलम्ची जाने सडक अवरुद्ध भएको छ । मेलम्ची नगरपालिका – १३ फटकशिला स्थित रातो पहरोमा सडक भासिएपछि यातायात सेवा अवरुद्ध भएको हो ।

मेलम्ची–जिरोकिलो सडकखण्ड स्थित फटकशिला रातो पहिरोमा ईन्द्रावती नदीले बाटो कटान गरेपछि मेलम्चीतर्फ जाने र मेलम्चीबाट आउने यातायात सेवा अवरुद्ध भएको हो ।२० मिटर सडकलाई नदीले कटान गरेको जिल्ला प्रहरी कार्यालय सिन्धुपाल्चोकका प्रहरी प्रमुख एसपी राजन अधिकारीले जानकारी दिए ।

अहिले मेलम्चीबाट काठमाडौं र काठमाडौंबाट मेलम्ची जाने सबै यातायातका साधन र यात्रु अलपत्र परेका छन् । वैकल्पिक मार्गबाट बाटो खुलाउने प्रयास भैरहेको जिल्ला प्रहरी कार्यालयले जानकारी दिएको छ ।