कालीकामा बस दुर्घटना हुँदा १८ घाइते, २ किचीए

९ भदौ, सुकुटे ।

सिन्धुपाल्चोकको सुनकोशी गाँउपालिका ३, कालीकाको छाप भन्ने स्थानमा यात्रुबहाक बस दुर्घटना हुँदा १८ जना घाइते भएका छन् । अन्य दुइ जना बेपत्ता छन् ।

बुधबार सुनकोशी गाँउपालिकाको ठोकर्पाबाट काठमाण्डौको लागि छुटेको कोशीपारी यातायातको बा ३ ख ८०३० नम्बरको बस दुर्घटना भएको हो । बस ढलान गरिएको घुम्ती सडकबाट करिब ३० मिटर तल खसेको जिल्ला प्रहरी कार्यालय, सिन्धुपाल्चोकका सुचना अधिकारी एवम् प्रहरी नायब उपरिक्षक दक्षकुमार बस्नेतले बताए ।

स्थानीयहरुले दुइ जना बसले च्यापिएर बसेको बताएपनि पुष्टि भैनसकेको बस्नेतले बताए । घाइते १८ जनामध्ये ३ जनाको खाडीचौरस्थित सिन्धु सदावहार अस्पतालमा र १५ जनालाई थप उपचारको लागि धुलिखेल अस्पताल रिफर गरिएको डीएसपी बस्नेतले बताए ।

बसको चालक तथा सहचालकको पहिचान नभइसकेकोले दुर्घटना के कारणले भएको हो भन्ने खुल्न नसकेको उनले बताए ।