कालीका बस दुर्घटनाः ३७ घाइते, २ गम्भीर(अपडेट)

९ भदौ, सुकुटे ।

सिन्धुपाल्चोकको सुनकोशी गाँउपालिका ३, कालीकाको छाप भन्ने स्थानमा यात्रुबहाक बस दुर्घटना हुँदा घाइतेको संख्या ३७ पुगेको छ । यसअघि गाडीमा च्यापिएका अन्य दुइ जनाको अवस्था भने गम्भीर रहेको छ ।

घाइतेमध्ये १५ जनाको सिन्धु सदावहार अस्पताल, खाडीचौरमा र २० जनाको धुलीखेल अस्पताल, काभ्रेपलाञ्चोकमा उपचार भइरहेको छ । खाडीचौरमा रहेका घाइतेहरुको अवस्था सामान्य रहेको र धुलीखेलमा रहेका २० जनाको अवस्था पनि खतरामुक्त रहेको जिल्ला प्रहरी कार्यालय, सिन्धुपाल्चोकका सुचना अधिकारी एवम् प्रहरी नायब उपरिक्षक दक्षकुमार बस्नेतले बताए । गाडीमा च्यापीएर बसकेका दुइजना पुरुषको भने अवस्था नाजुक रहेकोले उनीहरुलाई उपचारको लागि धुलिखेल अस्पताल लगिदैंगरेको बस्नेतले बताए ।

बुधबार सुनकोशी गाँउपालिकाको ठोकर्पाबाट काठमाण्डौको लागि छुटेको कोशीपारी यातायातको बा ३ ख ८०३० नम्बरको बस दुर्घटना भएको हो । बस ढलान गरिएको घुम्ती सडकबाट करिब ३० मिटर तल खसेको छ ।

बसको चालक तथा सहचालकको पहिचान नभइसकेकोले दुर्घटना के कारणले भएको हो भन्ने खुल्न नसकेको उनले बताए ।