सुकुटेमा दुर्घटना हुँदा एकको मृत्यु, एक घाइते

दुर्गा श्रेष्ठ

४ मंसिर, सुकुटे ।

अरनिको राजमार्गको सुकुटे नजिकै च्याने भन्ने ठाँउमा मोटरसाइकल र ट्रक एक आपसमा ठोक्किँदा एक जनाको मृत्यु भएको छ ।

चौतारा साँगाचोकगढी १०, सुकुटेमा विपरित दिशाबाट आएको ट्रकले मोटरसाइकललाई ठक्कर दिँदा मोटरसाइकलमा सवार बाह्रबिसेका एकबहादुर श्रेष्ठको घटनास्थलमै ज्यान गएको छ भने सोही मोटरसाइकलमा सवार आशिष श्रेष्ठ गम्भिर घाईते भएका छन । एकबहादुर घाइतेका बाबु हुन् ।

काठमाडौंबाट बाह्रबिसेतर्फ जाँदै गरेको बा ५ ख ४२८२ नम्बरको आईचरले काठमाडौंतर्फ जाँदै गरेको बा ०३१ प ०५८४ नम्बरको मोटरसाइकललाई ठक्कर दिँदा उक्त दुर्घटना भएको हो । घाइतेलाई उपचारको लागि बोलेरोमा राखेर काठमाडौं पठाइएको तत्काल घटनास्थलमा तत्काल पुगेका माओवादी केन्द्रका केन्द्रीय सदस्य माधव सापकोटा ‘सुवोध’ ले जानकारी दिए । प्रहरीका अनुसार मृतकको शव समेत धुलिखेल लगिएको छ ।

घटनापश्चात ठक्कर दिने आईचर भ्यान र चालक नियन्त्रणमा लिई थप अनुसन्धान भइरहेको जिल्ला प्रहरी कार्यालयका सूचना अधिकारी दक्षकुमार बस्नेतले जानकारी दिए । घटना बिहान करिब साँढे आठ बजे भएको हो ।