स्वर्गीय पत्रकार नेपाल सहायता कोषमा राप्रपा अध्यक्षको सहयोग

२१ मंसिर, चौतारा ।

हृदयघातका कारण निधन भएका स्वर्गीय पत्रकार नानीराम नेपालको परिवारलाई सहयोगका लागि प्रेस चौतारी नेपाल सिन्धुपाल्चोकले सुरुवात गरेको सहयोग कोषमा राष्ट्रिय प्रजातन्त्र पार्टी सिन्धुपाल्चोकका अध्यक्ष एवं निर्माण व्यवसायी संघ सिन्धुपाल्चोक पूर्व अध्यक्ष निलध्वज थापाले एकाउन्न हजार पाँच सय पचास रुपैयाँ सहयोग गरेका छन् ।

उक्त कोषमा संकलन गरिएकोमध्ये यो हालसम्मकै ठुलो रकम हो । अहिलेसम्म सो कोषमा ८ लाख रुपैंया संकलन भएको सो सहयोग संकलन अभियानका अभियन्ता एवं नेपाल पत्रकार महासंघ, सिन्धुपाल्चोकका उपाध्यक्ष दिनेश थापाले बताए । निलध्वजपछि सो कोषमा धेरै सहयोग गर्ने बाह्रबिसे नगरपालिकाका मेयर निमफुञ्जो शेर्पा पचास हजार र गातीका आङदोर्जे शेर्पा बीस हजार रुपैयाँ रहेको थापाले बताए ।
स्वर्गीय पत्रकार नेपाल नेकपा एमाले सम्बद्ध प्रेस चौतारी नेपालमा आवद्द थिए । उनको सहयोग कोषमा सहयोग गर्नेमध्ये शेर्पा एक्ला एमाले जनप्रतिनिधि हुन् । एमालेका सबै जनप्रतिनिधि र नेताहरूलाई सहयोगको लागि आग्रह गरेपनि कसैले नटेरेको अभियन्ता थापाले बताए ।

‘ज्युँदो हुँदा नानीरामजिले एमालेको लागि धेरै योगदान गर्नुभएको थियो ।’ अभियन्ता थापाले भने —‘उहाँको मृत्युपछि भने कुनै पनि एमालेबाट निर्वाचित जनप्रतिनिधिले उहाँको लागि सहयोग गर्नुभएन ।’ बरु फरक पार्टी भएर पनि स्वर्गीय नेपालको लागि राप्रपा अध्यक्ष निलध्वज थापाले गरेको अहिलेसम्मकै ठुलो सहयोगको लागि उनले धन्यवाद दिए ।

१० लाख रुपैयाँ संकलन गर्ने लक्ष्यका साथ सहयोग संकलन अभियान सुरुवात गरिएको हो । सो रकम संकलन भएपछि स्वर्गीय नेपालका छोरा र छोरीका नाममा ५ लाख रुपैयाँ मुद्दती खातामा जम्मा गरिनेछ । सो रकमको साँवा तथा व्याज रकम उनीहरु बालिग भएपछि मात्रै झिक्न सकिनेछ ।

अर्को ५ लाख रुपैयाँ भने स्वर्गीय नेपालको पिता र श्रीमतीको संयुक्त हस्ताक्षरमा सञ्चालन हुनेगरि मुद्दती खातामा नै जम्मा गरिदिने अभियन्ताको योजना छ । सो रकमको ब्याजबापत प्राप्त हुने रकम भने झिकेर परिवारले घरखर्चको लागि प्रयोग गर्न सक्नेछन् ।
स्वर्गीय नेपालको ४५ औं दिनको पुण्यतिथिमा सो सहयोग हस्तान्तरण गरिनेछ ।