माओवादी बागमतीमा सरल सहयात्री विजयी

६ पुस, चौतारा ।
नेकपा माओवादी केन्द्रको बागमती प्रदेश कमिटीको अध्यक्षमा सरल सहयात्री पौडेल विजयी भएका छन् । हिजो भएको मतदानबाट पौडेल भारी मतान्तरले विजयी भएका हुन् ।

उनका प्रतिस्पर्धी दिनानाथ गौतमले ८६ मत प्राप्त गरेकोमा पौडेलले भने झण्डै दोब्बर मतान्तरले जितेका हुन् । पौडेलले एक सय ६२ मत प्राप्त गरेको निर्वाचन समितिका प्रमुख सुन्दरराज रेग्मीले बताए ।

त्यस्तै कमिटीको उपाध्यक्षमा रुपा महर्जन १७८, रामप्रसाद ढुङ्गाना १०१ र प्रेमबहादुर पुलामि(छिन्तु) १३८ मतले विजयी भएका छन् ।

१४९ मत ल्याएर इन्द्रबहादुर थिङ (छिन्ताङ) सचिव पदमा विजयी भए भने सहसचिव पदमा दलबहादुर बुर्लाकोटी(विजय) ११५, माधवप्रसाद लामिछाने १०९ र प्रकाश श्रेष्ठ १०८ मतले विजयी भए ।

कोषाध्यक्ष पदमा भने १५३ मत ल्याएर संगीता भट्टराई विजयी भईन् ।