कोदालो बोकेर वडाध्यक्ष आफैं हिलो बाटोमा

१४ पुस, चौतारा ।

हिजो साँझदेखिको परेको पानीले देशभर चिसो बढेको छ । धेरै उच्च भेगहरुमा हिमपात भएको छ भने कच्ची सडकहरू पानी जमेर हिलाम्मे भएका छन् ।

झरि रोकिएपछि पनि पानी जमेका हिलाम्मे सडकहरुमा केहि दिनसम्म हिलो भइरहनेछन् भने झरिकै विचमा सडक यात्रा गर्नेहरु पानीको आहालमा समेत फस्न सक्दछन् । यसैलाई विचार पुर्‍याउदै सिन्धुपाल्चोकका एक वडाध्यक्ष आफैं कोदालो बोकेर सडकको पानी कटाउन निस्केको देखियो ।

आफैं कोदालो बोकेर सडकको पानी कटाउन निस्कने व्यक्ति हुन् -चौतारा साँगाचोकगढी नगरपालिका १४ का वडाध्यक्ष शेरबहादुर श्रेष्ठ ।

नियमित वडा कार्यालय सञ्चालनका लागि आएका श्रेष्ठले सेवाग्राहीलाई सेवा दिदै सडकको पानी कटाउन निस्केका हुन् । ‘झरिका कारण बाटोमा ठाँउठाँउमा पानी जमेर पैदल हिड्न पनि समस्या देखियो ।’ वडाध्यक्ष श्रेष्ठले भने – ‘ मोटरसाइकल चालक र पैदलयात्रुलाई गाह्रो हुने देखेपछि केही साथिको सहयोगमा आफैंले पानी कटाउने काम गरियो ।’