छ महिनामा चौताराको ३५ प्रतिशत खर्च

२८ पुस, चौतारा ।
आर्थिक वर्ष २०७८\०७९ को आधा समय सकिँदासम्म चौतारा साँगाचोकगढी नगरपालिकाको कुल बजेटको ३४ दशमलव ९ प्रतिशत रकम मात्रै खर्च भएको छ । आज सम्पन्न नगरपालिकाको एघारौं नगरसभामा सो कुराको जानकारी दिइएको हो ।

नगरपालिकाको यस वर्षको लागि एक अर्ब बीस करोड पचपन्न लाख चौरानब्बे हजार रुपैयाँ विनियोजन भएकोमा बयालीस करोड दश लाख उनान्साठी हजार रुपैयाँ मात्रै खर्च भएको हो । जसमध्ये चालु खर्चतर्फ त्रिहत्तर करोड ४० लाख पचहत्तर हजार रुपैयाँ विनियोजन गरेकोमा अठ्ठाइस करोड बयासी लाख सत्र हजार खर्च गरी ३९ दशमलव २ प्रतिशत प्रगति गरेको छ भने पुँजीगत तर्फ सत्चालीस करोड पन्ध्र लाख उन्नाइस हजार विनियोजन भएकोमा तेह्र करोड अठ्चालिस लाख बयालीस हजार रुपैयाँ खर्च गरी जम्मा २८ दशमलव १ प्रतिशत मात्रै खर्च भएको हो ।

सम्पूर्ण करहरू अनलाइन प्रणालीबाट संकलन गर्न सुरु गरेको नगरपालिकाले नगरपालिका तर्फ अठार लाख सोह्र हजार रुपैयाँ राजश्व संकलन गरेको छ भने वडातर्फ १४ वटै वडाबाट कुल सन्ताउन्न लाख सत्चालीस हजार रुपैयाँ राजश्व संकलन गरेको छ । वडागत तर्फ सबैभन्दा धेरै राजश्व वडा नं. ५ ले संकलन गरेको छ । सो वडाले मात्रै सत्र लाख चौतीस हजार रुपैयाँ राजश्व संकलन गरेको छ ।

नगरपालिकालाई दहत्तर बहत्तर तर्फबाट समेत राम्रो आम्दानी हुने गरेको छ । सो शीर्षकमा मात्रै पहिलो किस्ता वापत सुनकोशी नदीतर्फबाट दुई करोड सैँतीस लाख तीस हजार र इन्द्रावती नदीतर्फबाट छ करोड छयालीस लाख पन्ध्र हजार गरी कुल आठ करोड त्रियासी लाख पैँतालीस हजार रुपैयाँ संकलन भएको छ ।

नगरपालिकाबाटै सहकारीहरूको नियमन, दर्ता, खारेजी, अनुगमन तथा मल्याङ्कन हुने व्यवस्था शुरु भएपछि ११ वटा नयाँ सहकारी संस्था दर्ता भएका छन् भने नगरपालिकामा कुल सहकारीको संख्या एक सय सत्र पुगेको छ ।