दोलालघाटमा लुगा छाडेर एक जोडी बेपत्ता

८ माघ, दोलालघाट ।
काभ्रेको भुम्लु गाउँपालिका-८ दोलालघाटमा लगाएको कपडा छाडेर एक महिला र एक पुरुष बेपत्ता भएका छन् । एक दिनको फरकमा घरबाट हिडेका उनिहरु इन्द्रावती नदी र सुनकोसी नदीको दोभानको किनारमा आफ्ना लुगा जुत्ता छाडेर बेपत्ता भएका छन् ।

जिल्ला प्रहरी कार्यालय, काभ्रेका प्रहरी नायब उपरीक्षक हरि खतिवडाका अनुसार पनौती नगरपालिका-८ खरिबोटका ४० वर्षीय माधव फुयाँल र नमोबुद्ध नपा-५ को अन्दाजी ३० वर्षीया सिर्जना भण्डारी (कोइराला) दुबैले कालो जेन्ट्स ज्याकेट, गाढा सुन्तला रङ्गको लेडिज कोट, कालो र खरानी रङ्गका दुई जोर जुत्ता, कालो लेजिडज र जेन्ट्स पर्स, घडीलगायत सामग्री छाडेर बेपत्ता भएका हुन् । शुक्रबार बिहान दोभानमा मलामी गएका स्थानीयवासीले पुरुष र महिलाको लुगा देखेपछि दोलालघाट प्रहरीलाई खबर गरेका थिए ।

शुक्रबार छाडिएका सामग्रीको पहिचान उनीहरुका आफन्तले गरेका छन् । परिवारका अनुसार कोइराला गत आइतबारदेखि र फुयाँल सोमबारदेखि घरबाट बेपत्ता थिए फुयाँलको श्रीमती, एक छोरा र एक छोरी तथा कोइरालाको एक छोरी छ ।

‘उनीहरू शङ्कास्पद तरिकाले लुगा छाडेर बेपत्ता भएकाले हामीले सबै तरिका अपनाएर खोजी | गरिरहेका छौं,’ प्रहरी नायब उपरीक्षक खतिवडाले भने। बेपत्ता भएका दुवैको सुनकोसी नदीमा खोजीकार्य भइरहेको र यसमा सघाउन प्रहरीले सार्वसाधारणमा आग्रह पनि गरेको छ ।