सिन्धुमा एकैदिन तीन फरक दुर्घटनामा तीन जनाको मृत्युु

तीनवटा फरकफरक दुर्घटनामा सिन्धुपाल्चोकमा आज एकैदिन तीनजनाको मृत्युु भएको छ । दुईवटा छुट्टाछुट्टै सडक दुर्घटनामा दुईजनाको र लडेर अर्का एकजनाक‍ो मृत्यु भएको हो ।

आज शुक्रबार दिउसो जुगल गाउँपालिका ७, भिरकुनाको आफ्नै घरबाट याङ्लाकोट जान भनी स्कुटरमा हिडेकी २५ बर्षीया शोभा तामाङको स्कुटर दुर्घटनामा मृत्युु भएको हो । बा.९७ प ९१२६ नं. को स्कुटर अनियन्त्रित भई सडकबाट करीब ४० मिटर तल खस्दा घाइते भएकि तामाङको उपचारको लागि जिल्ला अस्पताल चौतारा ल्याइएकोमा चिकित्सकबाट मृत घोषणा भएको जिल्ला प्रहरी कार्यालय , सिन्धुपाल्चोकका प्रहरी नायब उपरीक्षक दक्षकुमार बस्नेतले बताए ।

त्यस्तै मेलम्ची नगरपालीका १२ सिन्धुखोला जर्केपुलमा बाहुनेपाटीबाट काभ्रे तर्फ जाँदै गरेको बा ७४ प ७४८२ नं. को मोटरसाइकल अनियन्त्रीत भई सडकबाट करिब ९० मि. तल खस्दा काभ्रे मण्डनदेउपुर नगरपालिका ६ तल्लो बजारका ४२ बर्षीया इन्द्र बहादुर खड्काको घटनास्थलमै मृत्यु भएको बस्नेतले बताए ।

मेलम्ची नगरपालिकाकै वडा नं १ भोटेचौरमा मामा घर काभ्रे जान भनी हिडेका मेलम्ची २ निबुगाँउका १८ बर्षीया मनोज तामाङ गोरेटो बाटोमा लडी घाईते भई उपचारको लागि सामुदायिक अस्पताल भोटेचौर ल्याइएकोमा चिकित्सकबाट मृत घोषणा भएको छ । तिनवटै घटना सम्बन्धमा थप अनुसन्धान भइरहेको प्रहरीले जनाएको छ ।