मोटरसाइकल दुर्घटनामा कदमबासकी शिक्षिकाको मृत्यु

सिन्धुपाल्चोकको चौतारा साँगाचोकगढी नगरपालिका ६, ब्याङ्चेपानीमा मोटरसाइकल दुर्घटना हुँदा एक जनाको मृत्यु भएको छ ।

सिन्धुपाल्चोककै चौतारा साँगाचोकगढी नगरपालिका ९, मुलखर्कको आदर्श आधारभुट विद्यालयकि शिक्षिका २४ बर्षकी अनिता तितुङ् तामाङको उपचारको क्रममा धुलिखेल अस्पतालमा मृत्यु भएको जिल्ला प्रहरी कार्यालय, सिन्धुपाल्चोकका प्रहरी नायब उपरीक्षक शिव बुढाथोकीले बताए ।

चौताराबाट चौतारा साँगाचोकगढि १, स्याउलेतर्फ जाँदै गरेको बा.प्र. २-०२७-७५५५ नम्बरको मोटरसाइकल अनियन्त्रित भई हिजो साँझ करिब ५ बजे चौतारा साँगाचोकगढी ६, ब्याङ्चपानीमा दुर्घटना भएको थियो । दुर्घटनापछि घाइते तामाङलाई उपचारको लागि चौतार अस्पताल ल्याइएकोमा अस्पतालले सामान्य उपचार गरि थप उपचारको लागि धुलिखेल पठाएको थियो । उनलाई राति करिब १२ बजे धुलिखेल अस्पततालले मृत्यु भएको घोषणा गरेको थियो ।

मृतक अनिता तितुङ तामाङ

मोटरसाइकल चालक चौतारा साँगाचोकगढी ५, कामिखेत बस्ने २६ बर्षीय अनिल तामाङको अवस्था भने सामान्य रहेको र उनलाई अनुसन्धानका लागि प्रहरी नियन्त्रणमा लिईएको छ । उनिहरु किन स्याउले तर्फ जाँदैथिए भन्ने भने खुलिसकेको छैन ।