वडाध्यक्षको पशुपंक्षी फर्ममा आगलागी हुँदा बालकको मृत्यु

सिन्धुपाल्चोकको बलेफी गाउँपालिका ४ लप्सेमा रहेको पशुपंक्षी फर्ममा आगलागी हुँदा १ जना बालकको मृत्यु भएको छ । आज बिहान करिब ९ बजे भएको आगलागीमा परी ३ वर्षीय निर्जल कार्कीको मृत्यु भएको हो । निर्जल फर्ममा कामदारको रुपमा कार्यरत निर्जला कार्कीको छोरा हुन् ।

बलेफी गाउँपालिका ४ का वडाध्यक्ष सुर्के तामाङको लप्से युवा पशुपंक्षी फर्ममा आगलागी हुँदा बालकको मृत्यु भएको हो । प्रहरी र स्थानीयवासीको सहयोगमा करिब १ घण्टा पछि आगो पूर्ण रुपमा नियन्त्रणमा आएको जिल्ला प्रहरी कार्यालय, सिन्धुपाल्चोकका निमित्त कार्यालय प्रमुख तथा सूचना अधिकारी प्रहरी नायब उपरीक्षक शिव कुमार बुढाथोकीले बताए । आगलागीका कारण करिब ६ लाख १४ हजार रुपैयाँ बराबरको सामानहरू जलेर क्षति भएको बुढाथोकीले बताए ।