एमसिसि टेबुल भएपछि मात्रै एमालेको धारणा सार्वजनिक हुन्छ— पोखरेल

४ माघ, चौतारा ।

नेकपा एमालेका महासचिव शंकर पोखरेलले एमसिसि संसदमा टेबुल भएपछि मात्रै एमालेको आधिकारीक धारणा सार्वजनिक हुने बताएका छन् । आज सिन्धुपाल्चोकमा आयोजित पत्रकार सम्मेलनमा बोल्दै पोखरेलले आफ्नो पार्टीको माग पुरा नहुञ्जेल संसद चल्न नदिने र संसद नचलुञ्जेल संसदमा पेश हुने कुनै पनि विषयमा आधिकारीक धारणा सार्वजनिक नगर्ने बताएका हुन् ।

अहिलेको गठबन्धन सरकारकै नेतृत्व भएको बेला यो सम्झौता भएकोले अहिलेको सरकारले नै यसको विषयमा जवाफ दिनुपर्ने उनले बताए । एमसिसिका विषयमा अहिलेसम्म सरकारको आधिकारीक धारणा सार्वजनिक नभएकोले सरकारको धारणा आएपछि मात्रै एमालेले आफ्नो धारणा बनाउने बताए ।

अहिलेको सरकारका मन्त्रीहरु एक पछि अर्को गर्दै जनतासामु नाङ्गीदै जाँदा पनि सरकारले लाचार भएर उनीहरुलाई कारबाही गर्न नसकेको उनले आरोप लगाए । गौर हत्याकाण्डको विषयमा मन्त्री रेणु यादवको भनाइ, आफुले खोप किनेर लगाएको स्वास्थ्यमन्त्री विरोध खतिवडाको अभिव्यक्ती र प्रेम आलेको अश्लिल शब्दका विषयमा सरकार मौन रहनु गलत रहेको उनले बताए ।

नेकपा एमाले सिन्धुपाल्चोको नवनियुक्त कार्यसमितिलाई सपथ ग्रहण कार्याक्रममा सहभागी हुन महासचिव पोखरेल जिल्ला आएकै दिन पार्टीका बागमती प्रदेश कमिटी सदस्य एवम् बलेफी गाउँपालिका अध्यक्ष केदार क्षेत्रीले भने एमाले परित्याग गरेका छन् । एमालेभित्र सामन्तवादी सोच मौलाउदै गएको, चाकडी चाप्लुसी र व्यक्तिवादी प्रवृत्ति बढ्दै गएकोले आफुले दल त्याग गरेको उनले बताए । एमाले एकढिक्का रहँदा समेत माधव नेपाल समुहमा रहेका क्षेत्रीले अब पनि राजनितिमा सक्रिय रहने बताएपनि आफु कुन पार्टीमा रहने भने बताएनन् ।