कोजाग्रत पुर्णीमाका दिन चुनावी मनोनयन दर्ता

मंसिर ४ गते हुने प्रतिनिधि सभा सदस्य तथा प्रदेश सभा सदस्य निर्वाचनको लागि असोज २३ गते कोजाग्रत पुर्णीमाको दिन मनोनयन पत्र दर्ता हुने भएको छ । निर्वाचन आयोगले जारी गरेको पहिलो हुने निर्वाचित हुने निर्वाचन प्रणाली तर्फको निर्वाचन कार्यक्रम सार्वजनिक गरेको हो ।

सार्वजनिक गरिएको निर्वाचन तालिका अनुसार असोज २३ गते विहान १० बजेदेखि साँझ ५ बजेसम्म मुख्य निर्वाचन अधिकृतको कार्यालयमा उम्मेदवारको मनोनयन दर्ता गरिनेछ । सोही दिन साँझ ७ बजेसम्ममा उम्मेदवारको नामावली प्रकाशन गर्ने कार्यक्रम बनाएको आयोगले दावि विरोध र उम्मेदवारी फिर्ताको प्रकृया सम्पन्न भएपछि असोज २६ गते ४ बजे उम्मेदवारलाई चिन्ह प्रदान गर्नेछ ।

प्रतिनिधि सभा र प्रदेश सभा सदस्यको समानुपातिक निर्वाचन प्रणाली तर्फको बन्दसूचीमा नाम समावेश भएको व्यक्ति प्रतिनिधि सभा सदस्य र प्रदेश सभा सदस्य निर्वाचनको पहिलो हुने निर्वाचित हुने निर्वाचन प्रणाली तर्फको उम्मेदवार हुन पाउने छैन भने प्रत्येक निर्वाचन क्षेत्रका सबै मतदान केन्द्रमा मतदान भएका सबै मतपेटिका मतदान अधिकृतबाट निर्वाचन अधिकृतको कार्यालयमा प्राप्त भए पश्चात मतगणना कार्य शुरू गरिने आयोगले जनाएको छ ।