निफ्राको शेयर अझै उच्च मुल्यमा पुग्ने

४ चैत, काठमाण्डौं ।

नेपाल इन्फ्रास्ट्रक्चर बैंक (निफ्रा) को शेयर अझै उच्च मुल्यमा वृद्धि हुने भएको छ । बैंकले लन्डन स्टक एक्सचेन्जमा बोन्ड जारी गर्ने भएपछि यसको शेयरमुल्य बढ्ने भएको हो ।

बैंकले चालु आर्थिक वर्षभित्रै लन्डन स्टक एक्सचेञ्जमा ३० मिलियन डलर बराबरको बोन्ड जारी गर्न हो । लन्डन स्टक एक्चेन्जमा सूचिकृत हुने गरि प्रक्रिया अगाडि बढेको योजना सफल भएमा अन्तर्राष्ट्रिय स्टक एक्सचेन्जमा सूचिकृत हुने निफ्रा पहिलो नेपाली कम्पनी बन्ने भएको छ । निफ्राका प्रमुख कार्यकारी अधिकृत रामकृष्ण खतिवडाले चालु आर्थिक वर्षभित्रै लन्डन स्टक एक्सचेञ्जमा सूचिकृत हुने गरी ३० मिलियन डलरको बन्ड जारी हुन लगेको बताएका हुन् । बैंकले यसको लागि नेपाल राष्ट्र बैंकबाट स्वीकृति पाइसकेको छ ।

“सो बोन्डका लगानीकर्ताले ८.५ प्रतिशत प्रतिफल पाउने छन्” खतिवडाले भने —“लन्डनकै एक प्रसिद्ध संस्थाले ‘क्रेडिट र्यापिङ’ गरि बोन्ड जारी हुन लागेको छ ।” पाँच वर्षे अवधिको सो बोन्डबाट प्राप्त रकमलाई नेपालका ठूला विकास पूर्वाधारमा लगानी गर्ने पनि उनले जानकारी दिए ।

ठूला विकास पूर्वाधारमा लगानी गर्ने उदेश्यले स्थापित निफ्राका लगानीकर्ताले प्रतिफलको चिन्ता गर्नै नपर्ने पनि उनले स्पष्ट पारे । खतिवडाले भने— “यो दीर्घकालिन प्रकृतिका पुर्वाधारमा लगानी गर्ने बैंक हो, एकै पटक धेरै होइन, दीर्घकालसम्म उचित प्रतिफल दिन्छौं ।” उनले अहिले पनि करिब १० प्रतिशत लाभांश वितरण गर्ने क्षमता रहेको तर त्यस सम्बन्धी प्रक्रिया भने अघि नबढेको बताए । निफ्राले बैंक तथा वित्तिय संस्थाका लागि पनि बोन्ड जारी गर्ने तयारी गरिरहेको छ ।