सागकी स्वर्ण बिजेता काजललाई लिसंखुपाखरले दियो दुई लाख

काठमाडौं । १३औँ सागकी स्वर्ण पदक विजेता काजल श्रेष्ठलाई लिसंखुपाखर गाउँपालिकाले आर्थिक सहयोग गरेको छ ।
लिसंखुपाखर गाउँपालिका– ५ की तेक्वान्दो खेलाडी काजल श्रेष्ठलाई गाउँपालिकाले दुई लाख रुपैयाँ सहयोग प्रदान गरेको हो।
२९ मेमा अजरबैजानमा हुने विश्व तेक्वान्दो प्रतियोगितामा भाग लिन श्रेष्ठ त्यसतर्फ जानुअघि उनलाई पालिका अध्यक्ष राजु लामाले सो रकम हस्तान्तरण गरे।
सिन्धुपाल्चोक तेक्वान्दोका अध्यक्ष प्रेम भण्डारीले नगद १५ हजार सहयोग गरेर उनलाई थप हौसला प्रदान गरेका छन्।
ललितपुरस्थित तेक्वान्दो तालिम केन्द्रमा कार्यक्रम गरेर नेपाल तेक्वान्दो संघका अध्यक्ष प्रकाशशमशेर राणाले काजलसहित आठ खेलाडीलाई बिदाइ गरे।