एसईई परिक्षा जेठमा गर्ने तयारी

काठमाण्डौ, १२ फागुन ।

राष्ट्रिय परिक्षा बोर्डले माध्यामिक शिक्षा परिक्षा (एसईई) जेठ महिनामा गर्ने तयारी थालेको छ । बोर्डले एक साताको फरक राखेर कक्षा १० को एसईई र कक्षा १२ को अन्तिम वार्षिक परीक्षा लिने गरी र आन्तरिक तयारी सुरु गरेको हो ।

बोर्डले २०७८ सालको जेठ तेस्रो साता एसईई र अन्तिम साता कक्षा १२ को अन्तिम परीक्षा लिने गरी तयारी थालेको हो । बोर्डका उपाध्यक्ष प्रा.डा. चन्द्रमणि पौडेलले परीक्षाका लागि आन्तरिक तयारी भइरहेको उल्लेख गर्दै चैतभित्र औपचारिक परीक्षाको कार्यतालिकाबारे औपचारिक रूपमा निर्णय गरिने जानकारी दिए । हाल दुवै तहको परीक्षाका लागि बोर्डले विभिन्न चरणको काम गरिरहेको छ ।

बोर्डको यो तयारी कार्यान्वयन हुन सके विद्यार्थीको शैक्षिक सत्रमा धेरै क्षति हुनेछैन । विगतका वर्षमा चैतमा एसईई र वैशाखमा कक्षा १२ को परीक्षा सञ्चालन गर्ने गरिएको थियो । एसईईका लागि देशभरका विद्यार्थीले रजिस्ट्रेसन फाराम भर्ने म्याद फागुन ६ गते सकिएको छ । हाल जिल्ला–जिल्लामा विद्यार्थीको अभिलेखीकरण गर्ने कार्य भइरहेको जानकारी बोर्डले दिएको छ ।

सबै विद्यार्थीको विवरण संकलन गर्न चैतसम्मको लागि मिति तोक्ने बोर्डको तयारी छ । यस पटक कोरोना भाइरस सङ्क्रमणका कारण विद्यार्थीको संख्या घट्न सक्ने बोर्डको आँकलन छ । सरकारले एउटा विद्यालय छोडेर अर्को विद्यालय गएको विद्यार्थीलाई लक्षित गरी यस पटक कक्षा १० मा समेत स्थानान्तरणको सुविधा दिने निर्णय यसअघि नै गरिसकेको छ ।