जिल्लामा आजसम्मकै धेरै कोरोनामुक्त

२४ जेठ, चौतारा ।

सिन्धुपाल्चोकमा आज एकै दिन सबैभन्दा धेरै तीन सय ८९ जना कोरोनामुक्त भएका छन् । यो जिल्लामा एकैदिन निको हुने सबैभन्दा धेरै संख्या हो ।

आजको तथ्याङ अनुसार एक सय ४६ महिला र दुई सय ४३ पुरुष कोरोना मुक्त भएका हुन् । स्वास्थ्य कार्यालय, चौताराका बरिष्ठ जनस्वास्थ्य अधिकृत दुर्गादत्त चापागाँइका अनुसार चौतारा साँगाचोकगढी नगरपालिकाका मात्रै सबैभन्दा धेरै एक सय ५७ जना कोरोना मुक्त भएका छन् । जसमध्ये ६० महिला र ९७ पुरुष रहेका छन् । यससँगै जिल्लामा कोरोना संक्रमण मुक्त हुनेको संख्या एक हजार ९५ रहेका छन् ।

आज सिन्धुपाल्चोकमा थप ३४ जनामा कोरोना संक्रमण पुष्टि भएको छ । ५ महिला र २९ पुरुषमा आज संक्रमण देखिएको हो । जिल्लामा जम्मा कोरोना संक्रमितको संख्या चार हजार दुइ सय ९२ पुग्दा दोस्रो भेरियण्टको मात्रै तीन हजार तीन सय ४६ रहेको छ । कोरोना संक्रमणबाट जिल्लामा २७ जनाको मृत्यु भएकोमा हाल दुइ हजार दुइ सय २४ जना सक्रिय संक्रमित रहेका छन् ।

सक्रिय संक्रमित मध्ये पनि ६३ जना मात्रै विभिन्न स्वास्थ्य संस्था तथा स्थानिय तहले सञ्चालन गरेका आइसोेलेशनहरुमा बसीरहेका छन् भने बाँकी होम आइसोलेशनमा रहेका छन् ।