यस्तो छ जुरे पहिरो पीडित राहत वितरण सम्बन्धी तत्कालीन प्रतिवेदन

पहिरोको आठ वर्ष पुरा हुनै लाग्दा सिन्धुपाल्चोकको जुरे पहिरो प्रभावितहरूको लागि विभिन्न व्यक्ति तथा संघ संस्थाहरूबाट तत्कालीन जिल्ला दैवी प्रकोप उद्धार समिति मार्फत सिन्धुपाल्चोक मार्फत वितरण गर्ने गरी प्राप्त सहयोग रकम वितरण गर्नको लागि मन्त्रिपरिषद् बैठकले रकम फुकुवा गरिदिएको छ । रकम फुकुवा भएपछि त्यसको वितरणको लागि छलफल समेत शुरु भएको छ ।

सिन्धुपाल्चोक जिल्लाको तत्कालीन माँखा र राम्चे गाउँ विकास समितिको बीच भागमा पर्ने जुरे (कान्ले) मा २०७१ साउन १७ गते बिहान गएको भीषण पहिरो र पहिरोको कारण सुनकोशी नदी थुनिन गई धनजनको ठूलो क्षति भएको थियो । सो पहिरोबाट प्रभावितहरूलाई क्षतिपूर्तिका लागि जनस्तरबाट संकलित सहयोग रकमलाई राहत स्वरुप वास्तविक पीडितहरूलाई न्यायिक तवरले वितरण एवं पुनर्वासको लागि व्यवस्थापन गन पीडितहरूको पुनवर्गीकरण गर्न जिल्ला दैवी प्रकोप उद्धार समितिले तयार गरेको ‘जुरे सुनकोशी पहिरो पीडित राहत वितरण मापदण्ड २०७१’ ले पीडितहरूलाई ६ वर्गमा वर्गीकरण गरेको थियो ।

तत्कालीन जिल्ला विकास समितिका योजना अनुगमन तथा प्रशासकीय अधिकृत गोकुल बस्नेतको संयोजकत्वमा नापी कार्यालयका प्रमुख शरदचन्द्र मैनाली प्रमुख, नेपाल पत्रकार महासंघ सिन्धुपाल्चोकका अध्यक्ष  युवराज पुरी, गैसस महासंघ प्रतिनिधि सोम सापकोटा, जिविस सदस्य मुरारी तिवारी  पहिरो पीडित प्रतिनिधि कृष्ण लामा सदस्य र जिविस सिन्धुपाल्चोकका राजेन्द्रप्रसाद प्याकुरेल सदस्य सचिव रहेको समिति निर्माण गरिएको थियो ।

सो समितिले अन्तरक्रिया तथा सुझाव संकलन गरी जिल्ला दैवी प्रकोप उद्धार समितिले तर्जुमा गरेको मापदण्डमा भएका सूचकहरु माथि छलफल तथा विश्लेषण मापदण्ड बमोजिम पीडितहरूको सूचना संकलन गरेको थियो ।

समितिले जिल्ला दैवी प्रकोप उद्धार समितिले तर्जुमा गरेको पीडित पुनवर्गीकरण मापदण्ड अनुसार सिन्धुपाल्चोकको माँखा र राम्चे गाविसको बीच भाग जुरे सुनकोशी पहिरोको कारण राम्चे, माँखा, टेकानपुर र धुस्कुनका प्रत्यक्ष पीडित परिवारहरूको मात्र सूचना संकलन गरेको थियो । समितिले पहिरोबाट क्षति भएका व्यापार व्यवसाय, चल सम्पत्ति, पशुधन, सवारी सधान, सुन चाँदी आदि सम्पत्तिको मूल्याङ्कन भने गरेको थिएन ।

प्रतिवदेन अनुसार क वर्गमा १३, ख वर्गमा ४१, ग वर्गमा ४३, घ वर्गमा ५८, ङ वर्गमा ६४ र च वर्गमा ६१ गरी कुल २ सय ८० परिवार प्रभावित भएको उल्लेख थियो ।

समितिले मापदण्ड बमोजिम पुनवर्गीकरण गरिएको पीडितहरूको प्राप्त अङ्कभार बमोजिम प्राथमिकता क्रम अनुसार वितरण गर्नपूर्व मृतक तथा बेपत्ता व्यक्तिहरूको आश्रितहरूलाई प्रति मृतक बेपत्ता सङ्ख्याको आधारमा निश्चित रकम विनियोजन गरेर मात्र बाँकी रकम वितरण गर्न सुझाव दिएको थियो भने पहिरो र डुबानको कारण भएको क्षति मध्ये चल सम्पतीहरु जस्तै सवारी सधान, व्यापार व्यवसाय, पशुधन, सुनचाँदी आदि सम्पतीहरुको क्षतिको मूल्याङ्कन यस मापदण्ड बमोजिमको मूल्याङ्कनमा समावेश नगरिएकोले त्यस प्रकारका क्षतीको समते क्षतिपुर्ती उपलब्ध गराउनु पर्ने भन्ने पीडितहरूको माग पनि रहेकोले जिल्ला दैवी प्रकोप उद्धार समितिले यस प्रकारका क्षतिलाई समेत सम्बोधन गर्नु पर्ने प्रतिवेदन दिएको थियो ।
जुरे\सुनकोशी पहिरो पीडित राहत वितरण मापदण्ड २०७१ बमोजिम पुर्न वर्गीकरण सम्बन्धी प्रतिवेदन यहाँ छ ।