सिन्धुपाल्चोकमा यसरी अलमलियो गठबन्धन

९ बैशाख, चौतारा ।
सत्तारुढ पाँच दल गठबन्धन नै गरेर चुनावमा सहभागी हुने भनिएपनि सिन्धुपाल्चोकमा भने गठबन्धन नै अलमलमा परेको छ । दलहरूको आपसी अहमताले सबै दलले धेरै भाग खोज्न थालेपछि गठबन्धन नै अलमलमा परेको हो ।

पाँच दलबीच गठबन्धन गर्ने भनिएपनि सिन्धुपाल्चोकमा भने मुख्य तिन मात्रै क्रियाशील छन् । नेपाली कांग्रेसको संयोजकत्वमा नेकपा माओवादी केन्द्र र नेकपा एकीकृत समाजवादी संलग्न वार्ता टोलीको पटकपटकको वार्ता विना निष्कर्ष टुङ्गिने गरेको बैठकका एक सहभागीले बताए । राष्ट्रिय जनमोर्चा पनि वार्तामा सहभागी हुन चाहेको भएपनि गठबन्धन नै अन्यौलमा पर्दा यसले ठोस रूप लिन सकेको छैन ।

गठबन्धनको सबैभन्दा ठुलो पार्टी नेपाली कांग्रेसले जिल्लाका १२ मध्ये ८ वटा पालीकामा आफ्नो नेतृत्व हुनुपर्ने अडानमा छ । २०७४ सालको स्थानीय तह निर्वाचनमा कांग्रेसले ३ वटा पालीका जितेको थियो । एमालेबाट जितेको बलेफी गाउँपालिका अध्यक्ष समेत कांग्रेस प्रवेश गरेकोले अहिले आफूहरूको नेतृत्वमा ४ पालीका रहेका उनीहरूको दावी छ । ‘हामीले चार पालीकाको नेतृत्व गरिरहेकाले त्यसको दोब्बर हुन आउने ८ पालीका पाउनुपर्छ भनेका हौं ।’ वार्ता समितिका संयोजक एवम् नेपाली कांग्रेस सिन्धुपाल्चोक सभापति जंगबहादुर लामाले भने —‘ दुईवटा पालीका जितेको माओवादीलाई पनि हामी ४ वटा पालीका दिन तयार छौं ।’ नेकपा एसलाई भने माओवादीकै भागबाट दिनुपर्ने कांग्रेसको प्रस्ताव छ ।

नेकपा माओवादी भने यो प्रस्ताव मान्न तयार छैन । जिल्लामा एमालेको शक्ति कमजोर भएको र आफूहरूको संगठन पनि थप मजबुत भएकोले आधाआधा भागबन्डा हुनुपर्ने अडानमा अझै अडिग छ । कांग्रेसलाई ६ वटा पालीकाको नेतृत्व दिएर ५ पालीमा आफू लिने र एउटा एसलाई दिने माओवादीको रहर छ । ‘यसअघि हामीले जितेका २ र दोस्रो भएको २ सहित ५ पालिकामा हाम्रो दाबेदारी कायम छ ।’ माओवादी सिन्धुपाल्चोक संयोजक गोविन्द पराजुलीले भने —‘चार पालीकामा हामी स्वतः जित्ने भएकोले गठबन्धन भएपछि थप एक पालीका माग गरेका हौं ।’ एसलाई पनि एउटा पालिकाको नेतृत्व दिनुपर्ने माओवादीको प्रस्ताव छ ।

ठूला नेताको जुँगाको लडाइँले समस्या

सिन्धुपाल्चोकको निर्वाचन क्षेत्र नं. १ दुई ठूला नेताको क्षेत्र हो । अहिलेका प्रतिनिधि सभा सभामुख अग्निप्रसाद सापकोटा र नेपाली कांग्रेसको केन्द्रिय सदस्य एवम् पूर्व सञ्चारमन्त्री मोहनबहादुर बस्नेत समेत सोही क्षेत्रका हुन् । आगामी संघीय तथा प्रदेश सभा निर्वाचनमा आफ्नो शक्ति बलियो बनाउन पनि उनीहरु दुवैजनालाई सो क्षेत्रमा सकेसम्म धेरै पालीकामा आफ्नो पार्टीको उम्मेद्वार जिताउनुछ ।

उनीहरूको आफ्नो क्षेत्रमा बढीभन्दा बढी पालीका आफ्नो पक्षमा पारेर पार्टीमा शक्तिशाली भएको पनि देखाउनुछ । त्यही आधारमा पार्टीबाट महत्वपुर्ण पदहरु हत्याउन पनि उनीहरु बढी भन्दा बढी पालीका लिने पक्षमा छन् । यसै जुँगाको लडाँईका कारण पनि सिन्धुपाल्चोकमा गठबन्धन कायम गर्न समस्या भइरहेको छ ।

कांग्रेस र एमाले मिल्न लागेको आरोप

सिन्धुपाल्चोकका माओवादी केन्द्र र नेकपा एकीकृत समाजवादीले कांग्रेस एमालेसँग मिल्न लागेको आरोप लगाइरहेका छन् । आफुहरुसँग पालीका बाँडफाँडमा संख्या नमिलेपछि एमालेसँग मिल्न लागेको आरोप उनीहरूले लगाएका छन् । दुइ पार्टीका जिल्ला अध्यक्षहरुले पत्र नै काटेर आफूहरूको गठबन्धन कायम गरिदिन पाँचदलीय गठबन्धनको बागमती प्रदेश कार्यदललाई गुहार मागेका छन् ।

कांग्रेस र एमाले मिलेर गएमा आफुहरु पत्तासाफ हुन डर उनीहरुमा छ । यसअघिको निर्वाचनमा १२ मध्ये ७ पालीका जितेको एमाले आफू अझैपनि कमजोर नरहेको दावि गरिरहेको छ । माओवादी र एसले लगाएको आरोपजस्तै कांग्रेस र एमाले मिल्ने हो भने जिल्ला सबैजसो पालिका जित्ने पक्का जस्तै छ ।